شیعہ نیوز: ایرانی صدر پزشکیان نے امن و اعتماد کے زیر عنوان بین الاقوامی اجلاس سے خطاب میں کہا ہے کہ بے عدالتی کی بنیاد پر ہی گزشتہ جون میں اسرائیلی حکومت نے ایران کے خلاف جارحیت اور سیکڑوں ایرانیوں کو خاک وخون میں غلطاں کردیا۔
رپورٹ کے مطابق صدر ڈاکٹر مسعود پزشکیان نے ترکمانستان میں منعقدہ امن و اعتماد کے زیر عنوان بین الاقوامی اجلاس سے خطاب میں کہا ہے کہ دنیا میں امن کے لئے ضروری ہے کہ کسی کو بھی بین الاقوامی قواعد و ضوابط سے بالاتر ہونے کی اجازت نہ دی جائے ۔
انھوں نے کہا کہ غاصب اسرائیلی حکومت نے گزشتہ جون میں ایران کے خلاف کھلی جارحیت کی اور سیکڑوں بے گناہ ایرانی عوام کو شہید کردیا اور اس کو بین الاقوامی تنبیہ کا سامنا بھی نہیں کرنا پڑا ۔
یہ بھی پڑھیں : مغرب، یوکرین بحران کو فلسطین سے توجہ ہٹانے کے لئے ہوا دے رہا ہے، سرگئی لاوروف
صدر ایران نے کہا کہ اس کھلی جارحیت پر اس کی تنبیہ کرنے کے بجائے، انسانی حقوق اور امن عالم کی حمایت کی دعویدار طاقتوں نے اس کی سیاسی اور فوجی حمایت کی ۔
ڈاکٹر مسعود پزشکیان نے کہا کہ جب تک اسرائیلی حکومت کے لئے اس طرح کا خصوصی حق موجود رہے گا اس وقت تک دنیا میں امن اور منصفانہ نظام کی بات نہیں کی جاسکتی۔
انھوں نے کہا کہ اگر دنیا واقعی امن اور منصفانہ نظام چاہتی ہے تو اس کو یہ حقیقت تسلیم کرنی ہوگی کہ کسی بھی ملک اور بڑی طاقت کو عالمی قواعد وضوابط سے بالاتر ہونے کی اجازت نہیں ہونی چاہئے۔
صدر مملکت نے کہا کہ موجودہ حالات میں سبھی ملکوں کی یہ ذمہ داری ہے کہ ہر ممکن شکل میں اخلاقی اصولوں اور کثیر فریقی رجحان پر استوار سفارت کاری کی پابندی کریں اور اس بات کو یقینی بنائيں کہ دنیا میں کوئی بھی طاقت کی زبان استعمال نہیں کرے گا۔
انھوں نے کہا کہ ہم ان حالات میں امن و اعتماد کے زیر عنوان منعقدہ اس اجلاس کو بین الاقوامی امن و اعتماد کے اصولوں سے انحراف کی روک تھام پر مبنی سبھی ملکوں کی عظیم ذمہ داری کی یاد دہانی سے تعبیر کرتے ہیں
The post چند طاقتوں کی اجارہ داری سے دنیا میں امن قائم نہیں ہوگا، صدر پزشکیان appeared first on شیعہ نیوز پاکستان.
