شیعہ نیوز: غزہ کی پٹی کے جنوبی شہر خان یونس میں واقع فلسطین ریڈ کریسنٹ ہسپتال میں بحالی اور فزیو تھراپی کا شعبہ حالیہ جنگ کا شکار درجنوں ایسے بچوں، نوجوانوں اور بالغ افراد کا علاج کر رہا ہے کہ جو قابض و سفاک صیہونی رژیم کے مجرمانہ حملوں کے نتیجے میں اعضاء کٹ جانے یا شدید زخموں، کا شکار ہوئے ہیں اور اس وقت انتہائی مشکل و کٹھن حالات میں زیر علاج ہیں۔ ترک خبررساں ایجنسی ایناڈولو کو دیئے گئے انٹرویو میں فلسطین ریڈ کریسنٹ بحالی ہسپتال کے ڈائریکٹر ڈاکٹر طارق الحفنی نے تاکید کی ہے کہ یہ مرکز اس وقت تقریباً 100 شدید زخمیوں اور معذوری سے دوچار مریضوں کا علاج کر رہا ہے، لیکن ہزاروں دیگر افراد بھی “بحالی کی خدمات” کے حصول کے منتظر ہیں کیونکہ غزہ کے کسی بھی دوسرے طبی مرکز میں، شدید زخمیوں کی بڑھتی تعداد کو سنبھالنے کی گنجائش ہے اور نہ ہی سہولیات!
عرب 48 کے مطابق ڈاکٹر طارق الخنفی نے مزید کہا کہ تمام بارڈر کراسنگز کی مسلسل بندش اور علاج معالجے کے لئے 20 ہزار زخمیوں کے غزہ سے باہر سفر پر غیر انسانی پابندی نے موجودہ بحران کو مزید گہرا کر دیا ہے جس کے باعث ہلال احمر ہسپتال پر بہت زیادہ دباؤ آن پڑا ہے۔ اس حوالے سے فلسطین ہلال احمر ہسپتال کے طبی عملے نے بھی خبردار کیا کہ موجودہ صورتحال کا مزید جاری رہنا انتہائی سنگین جسمانی و نفسیاتی نتائج کا باعث بن سکتا ہے، خاص طور پر کمسن بچوں میں، اور اگر بحالی کی خدمات کو وسعت دینے اور سہولیات فراہم کرنے کے لئے فوری اقدامات نہ اٹھائے گئے تو ہزاروں زخمی شہری، دوبارہ نقل و حرکت اور ملازمت کے حصول کے قابل کبھی نہ ہو سکیں گے۔
The post غزہ، کٹے اعضاء کا شکار ہزاروں مریض بحالی کی خدمات کے منتظر appeared first on شیعہ نیوز پاکستان.
