حماس نے غزہ امن فورس کیلئے شرائط واضح کر دیں

شیعہ نیوز: غزہ بورڈ آف پیس کے جمعرات کو ہونے والے اجلاس سے پہلے فلسطینی مزاحمتی تنظیم کا اہم اقدام سامنے آگیا۔ حماس نے غزہ امن فورس بھیجنے والے ممالک کیلئے شرائط واضح کر دیں۔ حماس کا کہنا ہے کہ امن فورس سرحد پر رہے اور فلسطین کے سول، سیاسی اور سکیورٹی امور میں مداخلت نہ کرے۔ ترجمان نے واضح کیا کہ غزہ میں عالمی فورس پر اعتراض نہیں، اگر وہ فریقین کے درمیان حفاظتی تہہ کے طور پر ہوں۔ ترجمان بسیم نعیم نے فلسطین کے داخلی امور میں مداخلت کو ناقابل قبول قرار دیتے ہوئے کہا کہ عالمی اہلکاروں نے مداخلت کی تو فلسطینی انہیں قابضین کا متبادل تصور کریں گے۔ حماس کا کہنا ہے کہ عالمی فورس کا کردار فریقین کو الگ رکھنا، جنگ بندی قائم رکھنا ہونا چاہیئے۔ یاد رہے کہ بورڈ آف پیس کے اجلاس میں فلسطین میں عبوری حکومت، حماس، مستقل جنگ بندی پر بات ہوگی۔ بورڈ آف پیس اجلاس کے ایجنڈہ میں عالمی امن فورس سےمتعلق امور بھی شامل ہیں۔