شیعہ نیوز: اسرائیلی فوج کی جانب سے ایران جنگ بندی نافذ ہونے کے باوجود لبنان پر اب تک کے شدید ترین فضائی حملے کیے ہیں۔
لبنان سول ڈیفنس کے مطابق ملک بھر میں اسرائیلی حملوں کے نتیجے میں شہادتوں کی تعداد بڑھ کر 254 ہوگئی ہے جبکہ 1165 افراد زخمی ہوئے ہیں۔
سول ڈیفنس کی جانب سے جاری اعداد و شمار کے مطابق بیروت میں 92 افراد شہید اور 742 زخمی ہوئے، بیروت کے جنوبی مضافاتی علاقوں میں 61 افراد شہید اور 200 زخمی ہوئے، بعلبک میں 18 افراد شہید اور 28 زخمی ہوئے، ہرمل میں 9 افراد شہید اور 6 زخمی ہوئے، نباتیہ میں 28 افراد شہید اور 59 زخمی ہوئے، عالیہ ضلع میں 17 افراد شہید اور 6 زخمی ہوئے، صیدا میں 12 افراد شہید اور 56 زخمی ہوئے جبکہ صور میں 17 افراد شہید اور 68 زخمی ہوئے۔ حکام کے مطابق امدادی کارروائیاں جاری ہیں اور شہادتوں میں مزید اضافے کا خدشہ ظاہر کیا جا رہا ہے۔
یہ بھی پڑھیں : ایران کے خلاف جنگی مقاصد حاصل نہ ہو سکے، نتائج مایوس کن ہیں، عاموس ہریل
لبنانی وزارت صحت کے مطابق آج ہونے والے اسرائیلی حملوں میں لبنان میں 112 افراد شہید اور 800 سے زائد زخمی ہوئے۔
غیر ملکی خبررساں ایجنسی کے مطابق بیروت میں مسلسل دھماکوں سے شہر گونج اٹھا اور دارالحکومت کے مختلف علاقوں سے دھوئیں کے بادل اٹھتے دیکھے گئے۔
اسرائیلی فوج کے مطابق جنگ کے دوران اب تک کی سب سے بڑی اور مربوط کارروائی میں بیروت، وادی بقاع اور جنوبی لبنان میں حزب اللہ کے 100 سے زائد کمانڈ سینٹرز اور فوجی مقامات کو نشانہ بنایا گیا۔
لبنان کی وزارت صحت کے مطابق بدھ کے روز حملوں میں درجنوں افراد شہید اور سیکڑوں زخمی ہوئے۔ حملوں کے بعد اسپتالوں میں ایمرجنسی نافذ کردی گئی جبکہ عوام سے خون کے عطیات دینے کی بیھ اپیل کی گئی۔
اسرائیلی وزیراعظم بنیامین نیتن یاہو نے کہا کہ ایران کے ساتھ جاری جنگ بندی لبنان پر لاگو نہیں ہوتی جبکہ اسرائیلی وزیر دفاع اسرائیل کاٹز کے مطابق ان حملوں میں حزب اللہ کو بڑا نقصان پہنچایا گیا۔
The post اسرائیل کے لبنان پر شدید حملے، 254 افراد شہید، 1100 سے زائد زخمی appeared first on شیعہ نیوز پاکستان.
