شیعہ نیوز: مجلس وحدت مسلمین بلوچستان کے جاری کردہ بیان میں عالمی منڈی میں پیٹرولیم مصنوعات کی قیمتوں میں کمی کے باوجود پاکستان میں پٹرول اور ڈیزل کی قیمتوں پر تشویش کا اظہار کرتے ہوئے کہا گیا ہے کہ وفاقی حکومت پیٹرولیم مصنوعات کی قیمتیں بڑھنے پر فوراً قیمتیں بڑھا دیتی ہیں، تاہم قیمتیں کم ہونے کے باوجود عوام الناس کو مہنگا پیٹرول فروخت کیا جا رہا ہے جو سراسر زیادتی ہے۔
بیان میں کہا گیا کہ حکومت ملکی اقتصاد کو مستحکم کرنے کے بجائے عوام الناس سے ٹیکس وصول کرنے کے مواقع تلاش کرتی ہے۔ جو ان کی نااہلی کا منہ بولتا ثبوت ہے۔ ہم مطالبہ کرتے ہیں کہ جلد از جلد پیٹرول کی قیمتوں میں کمی کا اعلان کیا جائے۔
یہ بھی پڑھیں : اسرائیل کا لبنان پر حملہ، کراچی میں شیعہ تنظیموں کا احتجاجی جلسہ
بیان میں کہا گیا کہ عالمی مارکیٹ میں 10 سے 15 ڈالر فی بیرل اضافے پر حکومت پیٹرول کی قیمتوں میں 137 روپے کا اضافہ کر دیتی ہے، اب اگر عالمی منڈی میں قیمتوں میں اتنے ہی ڈالر کی کمی ہوئی ہے تو عوام الناس کو اس ریلیف سے محروم کیوں رکھا جا رہا ہے۔
بیان میں کہا گیا کہ اس وقت پیٹرولیم مصنوعات کی قیمتوں میں اضافے کے باعث روزمرہ کی چیزیں یکے بہ دیگر متاثر ہو رہی ہیں۔ جتنی جلدی پیٹرولیم مصنوعات کی قیمتوں میں کمی کا اعلان کیا جائے گا، مہنگائی کے اس تسلسل پر قابو پانے میں آسانی ہوگی۔ ورنہ عوام الناس مہنگائی کی چکی میں پستے رہیں گے۔
بیان میں تاجر برادری، ٹرانسپورٹرز، وکلاء برداری اور سیاسی جماعتوں سے اپیل کی گئی کہ حکومتی اقدامات کے خلاف احتجاج کریں۔ اگر قیمتوں میں کمی نہ کی گئی تو مجلس وحدت مسلمین ملک بھر میں احتجاج کا راستہ بھی اپنا سکتی ہے۔
اس حوالے سے پارٹی کارکنوں کو تیار رہنے کی ہدایت دی گئی۔ بیان میں کہا گیا کہ مجلس وحدت مسلمین پاکستانی عوام کی ترجمان جماعت ہے۔ ہم عوام الناس کے حقوق کے لئے ہمیشہ آواز بلند کرتے رہیں گے۔ حکومت وقت کو بھی عوام کی آواز سنتے ہوئے جلد از جلد پیٹرولیم مصنوعات کی قیمتوں میں کمی کا اعلان کرنا ہوگا۔
The post حکومت پیٹرول کی قیمتوں میں کمی کا اعلان کرے، ورنہ احتجاج ہوگا، ایم ڈبلیو ایم appeared first on شیعہ نیوز پاکستان.
