شیعہ نیوز: اسلامی مزاحمتی تحریک حماس کے رہنما محمود مرداوی نے کہا ہے کہ قابض حکومت کی سرکاری سرپرستی میں جنین کے جنوب میں صانور بستی کی دوبارہ آباد کاری ایک خطرناک اور اشتعال انگیز قدم ہے جس کا مقصد مغربی کنارے میں فلسطینی وجود کو نشانہ بنانا اور اسے یہودی رنگ میں رنگنا ہے۔
محمود مرداوی نے اتوار کے روز ایک پریس بیان میں واضح کیا کہ آباد کاروں کے رہنماؤں اور قابض حکومت کے وزراء کی موجودگی میں اس بستی کا افتتاح آباد کاری کے ایک ایسے بے مثال پھیلاؤ کی عکاسی کرتا ہے جو الحاق کے منصوبوں اور فلسطینی زمینوں پر مکمل قبضے کے فریم ورک کا حصہ ہے۔
یہ بھی پڑھیں : امریکی مسلح افواج کی ڈکیتی کا بہت جلد جواب دیں گے، ترجمان خاتم الانبیاء
انہوں نے خاص طور پر شمالی مغربی کنارے میں آباد کاری کے منصوبوں میں تیزی اور ان بستیوں کی دوبارہ آباد کاری کے نتائج پر خبردار کیا جنہیں پہلے خالی کر دیا گیا تھا، انہوں نے زور دے کر کہا کہ یہ پالیسیاں زمینی حقائق کے لیے انتہائی خطرناک ہیں۔
انہوں نے فلسطینی عوام سے “بڑے پیمانے پر متحرک ہونے” اور عوامی غم و غصے کو مہمیز دینے کے ساتھ ساتھ مزاحمت کے تمام ذرائع کو فعال کرنے کی اپیل کی تاکہ ان آباد کاری کے منصوبوں کو ناکام بنایا جا سکے اور فلسطینی اراضی کو غاصبانہ حملوں سے بچایا جا سکے۔
واضح رہے کہ اسرائیل کے وزراء نے آج اس صانور بستی کو دوبارہ آباد کرنے کا افتتاح کیا ہے جسے تقریباً 20 سال قبل خالی کر دیا گیا تھا، یہ اقدام ایسے بیانات کے ساتھ سامنے آیا ہے جس میں فلسطینی ریاست کے قیام کو مسترد کیا گیا اور غزہ کی پٹی میں دوبارہ آباد کاری کی دعوت دی گئی۔
The post صانور بستی کی دوبارہ آباد کاری ایک خطرناک اشتعال انگیزی اور الحاق کے منصوبوں کا حصہ ہے، محمود مرداوی appeared first on شیعہ نیوز پاکستان.
