شیعہ نیوز: بلتستان میں داعیِ وحدت امام جمعہ والجماعت سکردو علامہ شیخ محمد حسن جعفری کی جانب سے شہید مظلوم قائد علامہ سید عارف حسین الحسینی رح کے فرزندان، حجۃ الاسلام سید علی حسینی اور سید حسین حسینی (سرپرست شہید فاؤنڈیشن پاکستان) کے اعزاز میں ایک باوقار دعوت کا اہتمام کیا گیا۔
اس موقع پر سینئر نائب صدر انجمنِ امامیہ بلتستان شیخ زاہد حسین زاہدی نے اہلیانِ بلتستان، بالخصوص علامہ شیخ محمد حسن جعفری اور علمائے کرام کی طرف سے فرزندانِ شہید قائد کو سرزمینِ بلتستان پر خوش آمدید کہا اور ان کی آمد کو باعثِ افتخار قرار دیا۔
انہوں نے اپنے خطاب میں کہا کہ بلتستان میں تمام مسالک کے درمیان رواداری، اخوت اور بین المسالک ہم آہنگی کی روشن روایت موجود ہے اور علامہ شیخ محمد حسن جعفری کی قیادت میں تمام مکاتبِ فکر کو ساتھ لے کر چلنے کی کوشش جاری ہے۔ بلتستان بین المسالک ہم آہنگی کا خوبصورت گلدستہ ہے۔
فرزندِ شہید قائد حجۃ الاسلام سید علی حسینی نے اپنے خیالات کا اظہار کرتے ہوئے کہا کہ پاراچنار کے مومنین کے مسائل پر علامہ شیخ محمد حسن جعفری نے ہمیشہ اپنے خطبات اور بیانات میں آواز بلند کی۔
یہ بھی پڑھیں : آبنائے ہرمز سےعبور کرنے پر ایران نے ٹیکس نافذ کردیا، عسکری کشیدگی اور مذاکرات کی بازگشت
انہوں نے کہا کہ آغا باقر الحسینی اور بلتستان کے دیگر علماء نے بھی ہر مشکل وقت میں پاراچنار کے مومنین کے ساتھ بھرپور یکجہتی کا اظہار کیا۔
ان کا کہنا تھا کہ اگرچہ پاراچنار اور بلتستان کے درمیان جغرافیائی فاصلہ موجود ہے، تاہم دلوں کی قربت ہمیشہ قائم رہی ہے اور پاراچنار کے عوام علامہ شیخ محمد حسن جعفری اور مومنینِ بلتستان کو قدر و احترام کی نگاہ سے دیکھتے ہیں۔
تقریب کے اختتام پر صدر انجمنِ امامیہ بلتستان آغا باقر الحسینی نے دعا کروائی اور شہید رہبرِ معظم آیت اللہ سید علی خامنہ ای، شہید قائد علامہ سید عارف حسین الحسینیؒ اور شہدائے اسلام کے ایصالِ ثواب اور بلندیِ درجات کے لیے فاتحہ خوانی کی۔
اس بابرکت محفل میں علامہ شیخ محمد حسن جعفری، شیخ محمد علی مظفری، شیخ زاہد حسین زاہدی، شیخ زاکر حسین، شیخ احمد ترابی، آغا سید احمد حسینی، شیخ الیاس قمی سمیت دیگر علمائے کرام اور معزز شخصیات نے شرکت کی۔
The post علامہ شیخ حسن جعفری کی جانب سے سکردو میں فرزندانِ شہید قائد علامہ سید عارف حسین الحسینیؒ کے اعزاز میں استقبالیہ دعوت کا انعقاد appeared first on شیعہ نیوز پاکستان.
