شیعہ نیوز: وفاق المدارس الشیعہ پاکستان کے نائب صدر علامہ سید مرید حسین نقوی نے افسوس کا اظہار کیا ہے کہ رہبر انقلاب اسلامی آیت اللہ سید علی خامنہ ای شہید کی شہادت پر تمام دنیا نے ایران کے ساتھ اظہار یکجہتی کیا، اس کی جرات بہادری اور اس کی امریکہ مخالف پالیسیوں کی تعریف کی ہے لیکن کچھ منافقین نے شہید رہبر کا مذاق اڑایا ہے۔ ان کا کہنا تھا رہبر معظم کی شہادت کے موقع پر جب پوری دنیا نے ملت تشیع کی بہادری، استقامت اور جرات کو سراہا، کچھ منافقین نے امریکی اور اسرائیلی زبان استعمال کی، جن میں سے ہمارے اندر موجود منافقین بھی سر فہرست ہیں۔ ظاہری طور پر اس وقت دنیا پر خدائی کے دعویدار امریکہ نے ایران کے خلاف ہر قسم کے حربے آزمائے، جارحیت کی لیکن ایران کے ساتھ اللہ تعالیٰ کی طاقت ہے اور امریکہ کا ہر حربہ ناکام بنا، کیونکہ سپر پاور صرف اللہ کی ذات ہے۔ دیکھ لیں کہ امریکی صدر نے ایران کو مذاق بنانے کی کوشش کی لیکن اللہ نے ٹرمپ کو دنیا بھر میں مذاق بنا دیا، اور وہ آج پاکستان سے ایران کے ساتھ مذاکرات کی بھیک مانگ رہا ہے، وہ خود اعلانات کرتا ہے اور واپس لے لیتا ہے، ایران کے پایہ استقلال میں کوئی لغزش نہیں آئی۔
انہوں نے کہا پاکستان میں امریکہ نے 200 ارب ڈالرز کی سرمایہ کاری کرنے کا اعلان کیا ہے، پاکستان کے ایئرپورٹس کی اپگریڈیشن کرنا چاہتا ہے، یہ دراصل پاکستان کے اہم مقامات کو اپنی تحویل میں لینے کی سازش کا حصہ ہے۔ موجودہ حالات میں عوام کی مشکلات کی طرف اشارہ کرتے ہوئے علامہ مرید نقوی نے کہا حکمران اگر ملک کے لیے مخلص ہیں تو اپنی تنخواہوں سے کٹوتی نہ کروائیں بلکہ مراعات کو ختم کریں، اتنے بڑے بڑے گھر دوسرے ممالک کے وزیر اعظم اور صدر کے پاس نہیں ہوتے، جتنے ہمارے ڈپٹی کمشنر سطح کے افسران کے پاس ہیں۔ انہوں نے آرمی چیف فیلڈ مارشل سے اپیل کی ہے معاہدوں پر نظر رکھیں کیونکہ آپ ملک کی ناموس کے محافظ ہیں، امریکہ بہت شاطر ہے، اس سے آگاہ رہنا ضروری ہے۔ انہوں نے کہا قرآن مجید میں اللہ تعالیٰ فرماتا ہے کہ منافقین جب مومنین سے ملتے ہیں تو کہتے ہیں ہم تمہارے ساتھ ہیں اور جب شیاطین سے ملتے ہیں تو کہتے ہیں ہم تمہارے ساتھ ہیں اور جب ان سے پوچھتے ہیں کہ وہاں کیا کرنے گئے تھے تو کہتے ہیں ہم تو ان مومنین کے ساتھ مذاق کرتے ہیں۔
انہوں نے کہا کہ اللہ تعالیٰ فرماتا ہے کہ دراصل ہم ان کے ساتھ مذاق کرتے ہیں اور انہیں سرگرداں کر دیتے ہیں۔ پاک پیغمبر صلی اللہ علیہ وآلہ وسلم سے پوچھا گیا کہ کافر اور منافق میں سے کون زیادہ خطرناک ہے تو آپ نے فرمایا کہ منافق کافر سے زیادہ بدتر اور خطرناک ہے۔ انہوں نے کہا کہ حضرت رسول خدا صلی اللہ علیہ والہ وسلم نے منافق کی تین نشانیاں بتائی ہیں، جھوٹ بولتا ہے، وعدہ خلافی کرتا ہے اور امانت میں خیانت کرتا ہے۔ آپ بغور جائزہ لیں تو ایران اور ملت تشیع کے مخالفین میں یہ سب صفات پائی جاتی ہیں۔
The post پوری دنیا نے ملت تشیع کی بہادری، استقامت اور جرات کو سراہا، کچھ منافقین نے امریکی اور اسرائیلی زبان استعمال کی، علامہ مرید حسین نقوی appeared first on شیعہ نیوز پاکستان.
