شیعہ نیوز: تحریک بیداری امت مصطفیٰ کے سربراہ علامہ سید جواد نقوی نے نشتر پارک کراچی میں منعقدہ مرکزی چہلم امام خامنہ ای ؒ و رفقاء سےاپنے خطاب میں ظلم کے خلاف مزاحمت کو امت مسلمہ کے لیے نجات کا ذریعہ قرار دیتے ہوئے کہا کہ اگر مودی جیسا متکبر شخص پاکستان کی طرف ناپاک نگاہ اٹھائے، ٹرمپ جیسا فاسد کردار ایران کی جانب میلی آنکھ سے دیکھے یا صیہونی طاقت عالم اسلام پر غاصبانہ نگاہیں ڈالے تو ان سب کے سامنے حسینیوں کی صف آرائی موجود ہوگی۔
انہوں نے کہا کہ امریکہ کا مقصد اپنے ناجائز اڈوں کو برقرار رکھنا اور غاصب صیہونی ریاست کو خطے کی ایک معمول کی ریاست کے طور پر تسلیم کرانا ہے، مگر شہید امام خامنہ ای کی قیادت میں حماس، حزب اللہ اور دیگر اسلامی مزاحمتی تحریکوں نے امریکی و صیہونی عزائم کے برعکس پوری دنیا کے باضمیر لوگوں کو متحد کر دیا ہے۔
علامہ جواد نقوی نے امام خامنہ ای کے طے کردہ اصول کے مطابق اسرائیل کی نابودی اور خطے سے امریکی اثر و رسوخ کے خاتمے کو ہی عالمی تسلط پسند قوتوں کے جرائم کے خاتمے کا واحد راستہ قرار دیا۔
یہ بھی پڑھیں : نشترپارک میں بیادشہید رہبرامام خامنہ ای ؒتاریخی اجتماع،امریکی سفارت خانوں کی بندش اور سفیر کی ملک بدری کا مطالبہ
انہوں نے اعلان کیا کہ 13 جون کو مینار پاکستان پر عظیم الشان اجتماع میں شہید رہبر کی شاندار قیادت کو خراج پیش کیا جائے گا، جو یہ ثابت کرے گا کہ شیعہ و سنی ایک جان ہیں، ان کا دشمن ایک ہے اور محاذ بھی ایک ہے تاکہ فرقہ وارانہ سازشوں کا ہمیشہ کے لیے خاتمہ ہو۔ اسی مقام سے امریکہ، اسرائیل اور ان کے حواریوں کی غاصبانہ پالیسیوں کے خلاف پاکستانی عوام کی متحد آواز بلند ہوگی۔
علامہ جواد نقوی نے زور دے کر کہا کہ یہ وہ لمحہ ہے جب ہم قائد اعظم کے نظریے کے مطابق پاکستان کو ظلم کے خلاف آخری دفاعی دیوار بنانے کا عہد کریں اور ایران کے خلاف ہر سازش کے تناظر میں اپنے برادر ملک کے ساتھ غیر مشروط یکجہتی کا عملی پیغام دیں۔
The post آج شہید رہبر ؒ کی دلی آرزو وحدت کو قوم نے ان کے چہلم پر نشترپارک میں عملی کردکھایا ہے،علامہ سید جواد نقوی appeared first on شیعہ نیوز پاکستان.
