شیعہ نیوز: شہید رہبرِ معظم انقلاب حضرت آیت اللہ العظمیٰ امام سید علی حسینی خامنہ ایؒ و شہدائے جانثاران رہبرؒ کے چہلم کی منابست سے امامیہ اسٹوڈنٹس آرگنائزیشن کراچی ریجن، امامیہ آرگنائزیشن کراچی ریجن، تحریک بیداری امت مصطیٰؑ کراچی، مجلس وحدت مسلمین کراچی ڈویژن اور ھیئت ائمہ مساجد و علماء امامیہ پاکستان کے زیر اہتمام نشترپارک کراچی میں منعقدہ عظیم الشان اجتماع بعنوان ’’بعثت خون‘‘ سے خطاب کرتے ہوئے علمائے کرام نے پاکستان میں موجود امریکی سفارتخانے کو فوری بند کرنے، امریکی سفیروں اور عملے کو ملک بدر کرنے کا مطالبہ کرتے ہوئے خطے کے مسلم ممالک پر زور دیا ہے کہ وہ نیٹو کے مقابلے میں مشترکہ مسلم عسکری اتحاد قائم کریں، مسلم ممالک کے درمیان سفارتی تعلقات کو مضبوط بنانے اور اتحاد و یکجہتی کو فروغ اور فلسطین اور لبنان کے عوام پر امریکہ و اسرائیلی جارحیت کو فوری بند کیا جائے، نشترپارک میں منعقدہ عظیم الشان اجتماع سے اپوزیشن لیڈر سینیٹ و مجلس وحدت مسلمین پاکستان کے چیئرمین سینٹر علامہ راجہ ناصر عباس، تحریک بیداری امت مصطفیٰؐ کے سربراہ علامہ جواد نقوی، گلگت بلتستان کے معروف عالم دین آغا راحت حسین حسینی، امامیہ اسٹوڈنٹس آرگنائزیشن پاکستان کے مرکزی صدر سید امین شیرازی، جماعت اسلامی پاکستان کے مرکزی رہنما ڈاکٹر معراج الہدیٰ صدیقی، بزرگ عالم دین شیخ حسن صلاح الدین، علامہ سید علی مرتضیٰ زیدی، جعفریہ الائنس کے سینئر نائب صدر علامہ نثار قلندری، علامہ ڈاکٹر عقیل موسیٰ، علامہ صادق رضا تقوی، مولانا اصغر شہیدی، مولانا روح اللہ رضوی، مولانا نعیم الحسن، مولانا آغا زین، مولانا رضا مہدی، مولانا سجاد مرتضوی و دیگر نے خطاب کیا۔
مرکزی اجتماع چہلم میں صوبائی وزیر سید ناصر حسین شاہ، تحریک انصاف کے سینئر رہنما فردوس شمیم نقوی سمیت بڑی تعداد میں دیگر نے شرکت کی۔ اجتماع میں بڑی تعداد میں خواتین بچوں سمیت ہزاروں افراد نے شرکت کی۔ اجتماع کے دوران شرکاء مولانا نسیم حیدر زیدی کی اقتداء میں باجماعت نماز مغربین ادا کی۔ نشترپارک کراچی میں عظیم الشان اجتماع کے موقع پر امریکی اسرائیلی حملے میں میناب اسکول ایران کی شہید کمسن بچیوں کو خراج عقیدت پیش کیا گیا، جامعۃ الزہرا (س) کی کمسن بچیوں نے عربی زبان میں پُردرد نظم پیش کی، جبکہ میناب کے شجرہ طیبہ اسکول پر امریکی اسرائیلی بمباری کے خلاف منفرد احتجاج بھی کیا گیا، پنڈال میں میناب اسکول کی کمسن شہداء سے متعلق تصاویر کی نمائش بھی لگائی گئی، کمسن شہید بچیوں کی یاد میں اسکول بیگز، جوتے اور کتابیں رکھی گئیں۔ مرکزی اجتماع چہلم میں حرم حضرت امام علی رضا (ع) مشہد مقدس کے خصوصی وفد نے شرکت کی، خادمین آستان قدس رضوی گنبد مقدس حرم امام رضا (ع) کا پرچم اپنے ہمراہ بطور تبرک لائے، وفد حرم حضرت امام رضا (ع) خانوادہ شہدائے یکم مارچ سے اظہار تشکر کیا اور کہا کہ ہم سب مل کر رہبر شہید معظم کی فکر عام کرینگے، سربراہ آستان قدس رضوی آیت اللہ مروی کی جانب سے پاکستانی قوم کا شکریہ ادا کرتے ہیں۔
یہ بھی پڑھیں : انقلاب اسلامی کربلا کا تسلسل ہے، 1400 سال بعد قرآنی نظام قائم ہوا، علامہ راجہ ناصر عباس جعفری
علامہ راجہ ناصر عباس نے خطاب کرتے ہوئے کہا کہ غزہ، لبنان، ایران پر امریکی و اسرائیلی جارحیت کو مستقل بند کیا جائے، خطے سے امریکی فوجی اڈوں کا مکمل خاتمہ کیا جائے، پاکستان کو امریکی کالونی نہیں بننے دیں گے، برابری کی سطح پر تعلقات قائم کئے جائیں۔ انہوں نے کہا کہ کراچی سمیت اسلام آباد اور دیگر مقامات پر امریکی سفارتخانوں کے سامنے پُرامن احتجاج میں امریکی میرین کمانڈوز کی جانب سے گولیاں چلا کر دہشتگردی کی گئی، امریکی میرین کمانڈوز کی جانب سے شہید ہونے والے نوجوانوں کے لواحقین کے ساتھ اظہار یکجہتی کرتے ہیں۔ انہوں نے کہا کہ اگلا مرحلہ مینار پاکستان پر ملک گیر اجتماع کرنا ہے، مینار پاکستان پر فیصلہ کن اجتماع ہوگا، ایران میں صرف ایک قوم کو خراج تحسین پیش کیا جا رہا ہے، ایران کا بچہ بچہ پاکستانی پرچم اٹھا کر شکریہ پاکستان کے نعرے لگا رہا ہے، پاکستان کو یہ عزت یکم مارچ کے شہداء کی بدولت ملی ہے، اتحاد وہ طاقت ہے جس کے آگے دشمن خود جھک جاتا ہے۔
علامہ راجہ ناصر عباس جعفری نے کہا کہ امام حسینؑ نے اپنے کردار سے حق اور باطل کے درمیان واضح لکیر کھینچ دی، ہم نے شدید ترین مظالم کے باوجود طول تاریخ میں ظلم کے آگے سر نہیں جھکایا، انقلاب اسلامی کربلا کا تسلسل ہے، 1400 سال بعد ایسا نظام قائم ہوا جس کی اساس قرآنی تعلیمات ہے، جب روس اور امریکا کے سامنے دنیا جھکی ہوئی تھی تو انقلاب اسلامی نے لاشرقیہ لاغربیہ کا نعرہ لگایا، ایران کیخلاف صرف صدام نہیں بلکہ پوری دنیا کھڑی تھی، 35 دن میں تہران پر قبضے کا خواب دیکھنے والے خرم شہر میں پھنسے رہے، امام خمینیؒ نے بتایا جب تک ظلم ہے جدوجہد جاری رہے گی، ہم ہر ظالم کے دشمن ہیں، چاہے وہ شیعہ ہی کیوں نہ ہو اور ہر مظلوم کے حامی ہیں چاہے وہ غیر مسلم ہی کیوں نہ ہو، امام خمینیؒ کے بعد رہبر انقلاب کی کاوشوں کی بدولت ہر گھر قرآنی بن گیا، شہید رہبر آیت اللہ خامنہ ای ایک اسٹریٹجسٹ تھے، اتحاد و وحدت کوئی ٹیکٹیکل کام نہیں بلکہ پوری اسٹریٹیجی ہے، کوئی غیرمسلم انسان ہو سکتا ہے، لیکن ٹرمپ اور نیتن یاہو انسان کہلانے کے لائق نہیں۔
یہ بھی پڑھیں : امریکہ ایران سے مذاکرات کی بھیک مانگ رہا ہے، آقای راحت حسین الحسینی
علامہ جواد نقوی نے خطاب کرتے ہوئے کہا کہ یکم مارچ کو کراچی میں شہید ہونے والے نوجوانوں کو سلام پیش کرتے ہیں، 37 برسوں میں شہید رہبر نے جو کچھ انجام دیا اس کو جاننا بہت ضروری ہے، امام خمینیؒ، شہید مطہریؒ اور شہید بہشتیؒ نے جس نظام سازی کی بنیاد رکھی، آیت اللہ خامنہ ای نے اسے تکمیل تک پہنچایا، شہید آیت اللہ خامنہ ای نے کوئی کام ادھورا نہیں چھوڑا۔ علامہ جواد نقوی نے کہا کہ دشمن نے جس کام میں روڑے اٹکائے، رہبر شہید نے اپنے خون سے وہ سارا راستہ صاف کر دیا، جب ایران نے یورینیم بچا لیا تو رہبر کو بھی بچا سکتے تھے، لیکن جو قوم کو چھوڑ کر چھپ جائے وہ رہبر نہیں ہوتا، امام حسینؑ کا فرمان ہے موت قبول کر لو، ظالم کے سامنے سر نہ جھکاؤ، آیت اللہ خامنہ ای نے شہادت سے قبل معاشرے کے تمام 23 طبقات کو ذمہ داریاں بتائیں۔ انہوں نے کہا کہ سید مجتبی نے اپنے پیغام میں فرمایا شہید علی خامنہ ای پاکستان سے محبت کرتے تھے، رہبر معظم سید مجتبی خامنہ ای نے فرمایا میں خود بھی پاکستان سے اپنی محبت چھپا نہیں سکتا، شہید رہبر معظم قوم کو یکجا دیکھنا چاہتے تھے، ایک دوسرے کی توہین اور تنقیص کرنے پر ٹرمپ خوش ہوگا، ٹرمپ خوش ہوا تو آپ کو وائٹ ہاؤس میں ناشتہ کرائے گا، اسناد دے گا۔
آغا راحت حسین الحسینی نے خطاب کرتے ہوئے کہا کہ کراچی کے غیور اور وفادار علماء اور جوانوں کو سلام پیش کرتا ہوں، فلسطین، کشمیر اور گلگت بلتستان کے عوام مظلوم ہیں، دنیا بھر میں ڈھائے جانے والے مظالم کا ذمہ دار امریکا ہے، امریکا اور اسرائیل کو نہیں معلوم انہوں نے کس قوم کو چھیڑا ہے، امریکا ایران سے مذاکرات کی بھیک مانگ رہا ہے۔ انہوں نے کہا کہ ہم شہید رہبر معظم کے پاک خون سے عہد کرتے ہیں، پاکستانی قوم رہبر معظم سید مجتبیٰ خامنہ ای کے فرمان کی منتظر ہے، دنیا کی توجہ ایران کے بعد اسلامی جمہوری پاکستان کی طرف ہے۔
یہ بھی پڑھیں : پاکستانیوں کے لیے نام نہاد غزہ بورڈ میں شمولیت ناقابل قبول ہے، سید امین شیرازی
مرکزی صدر آئی ایس او سید امین شیرازی کا خطاب کرتے ہوئے کہنا تھا کہ آج ہم رہبر معظم سید مجتبی خامنہ ای سے تجدید عہد کرنے آئے ہیں، تمام مسلمانوں نے حق کو پہچان لیا ہے، مکتب اہلبیت (ع) نے ہمیشہ ظالموں کو للکارا ہے، سید حسین نصر اللہ، یحییٰ سنوار، اسماعیل ہانیہ اور سید خامنہ ای نے حق کیلئے قربانیاں دیں، جب دنیا خاموش تماشائی بنی ہوئی تھی تب امام خمینیؒ کے پیروکاروں نے لوگوں کو بیدار کیا، امریکا تنگ گلی سے نکلنا چاہتا ہے لیکن ناکام ہے، طوفان الاقصیٰ سے آج تک امریکا اور اسرائیل ایک بھی ہدف حاصل نہیں کر سکے، دنیا میں ہونے والے ہر ظلم کیخلاف آواز اٹھائیں گے، پاکستانیوں کیلئے نام نہاد غزہ بورڈ میں شمولیت ناقابل قبول ہے، پاکستانی قوم امریکا اور اسرائیل سے نفرت کرتی ہے، 13 جون کو مینار پاکستان پر تاریخی اجتماع کریں گے، شہداء سے عہد کرتے ہیں کہ رہبر معظم سید مجتبیٰ خامنہ ای کی ہر آواز پر لبیک کہیں گے۔
مولانا علی مرتضیٰ زیدی نے خطاب کرتے ہوئے کہا کہ تاریخ میں اہل حق کے لشکر کو کبھی آج جیسی طاقت نہیں ملی، جمہوری اسلامی ایران کے انقلابی لوگ 60 روز سے سڑکوں پر ہیں، امریکا نے سوچا تھا رہبر کی شہادت کے کچھ روز بعد ہی انقلاب اسلامی ختم ہو جائے گا، دشمن کو معلوم ہی نہیں تھا رہبر معظم نے کیا تدبیر کر رکھی ہے، شہید رہبر کے قاتل کہیں نہیں چپ سکیں گے، امریکی اور اسرائیلی نظام آخری سانسیں لے رہا ہے، ہم خون دے دیں گے لیکن کفر کے سامنے سر نہیں جھکائیں گے۔ مولانا ڈاکٹر عقیل موسی نے خطاب کرتے ہوئ کہا کہ باطل سے ہم اہل حق ہمیشہ برسرپیکار رہیں گے، پاکستان میں امریکی نفوذ کی کوئی جگہ نہیں، ہمارے فیصلے واشنگٹن یا برطانیہ میں نہیں ہونے چاہیئے، پاکستان سے امریکی وجود کا خاتمہ ضروری ہے۔
جماعت اسلامی پاکستان کے مرکزی رہنما ڈاکٹر معراج الہدیٰ صدیقی نے خطاب کرتے ہوئے کہا کہ ڈونلڈ ٹرمپ نے امریکا کو دلدل میں پھنسا دیا ہے، جمہوری اسلامی ایران دنیا میں سپرپاور بن کر ابھرا ہے، پوری دنیا حتیٰ یورپی ممالک بھی امریکا کے خلاف کھڑے ہیں، امریکا، اسرائیل اور بھارت تنہا ہوگئے ہیں۔ بزرگ عالم دین شیخ حسن صلاح الدین نے کہا کہ ایران کا جوابی حملہ ایک معجزہ ہے، امریکا اور اسرائیل کے سپر پاور ہونے کا زعم تباہ ہوگیا، تنہا ایران نے دنیاوی سپر پاور کو ذلیل و رسوا کر دیا، اگر صرف 4 ممالک جمع ہو جائیں تو اسرائیل بلکل ختم ہو جائے گا، پاکستان، ترکیہ، ایران اور سعودی عرب مل جائیں تو بہت بڑی تبدیلی آ سکتی ہے، مسلم امہ کے نام نہاد حکمران امریکہ کے غلام ہیں، کراچی کی سڑکوں سے شہید رہبر آیت اللہ خامنہ ای کی تصاویر اتارے جانے کی مذمت کرتے ہیں، اگر ہم نے آواز دی تو آپ کی پارٹی کے لوگ بھی آپ کو ووٹ نہیں دے گی۔
یہ بھی پڑھیں : ریمدان اور تفتان بارڈرکوزائرین کیلئےکھولاجائے،علمدار سالاران ایسوسی ایشن کافیلڈ مارشل عاصم منیرسے مطالبہ
جعفریہ الائنس پاکستان کے سینئر مرکزی نائب صدر علامہ نثار احمد قلندری کا خطاب کرتے ہوئے کہنا تھا کہ شہید رہبر معظم سید علی خامنہ ایؒ نے حقیقی معنوں میں حضرت امام حسین (ع) کی آواز پر لبیک کہا، شہید رہبر معظم نے بتا دیا کہ ہم امریکا اور اسرائیل کو سرنگوں کرنا جانتے ہیں۔ تحریک بیداری امت مصطفیٰؐ کے رہنما آغا زین نے خطاب کرتے ہوئے کہا کہ امریکی نظام کو حق کی راہ میں رکاوٹ نہیں بننے دیں گے، امریکا اور اسرائیل کے خلاف جدوجہد جاری رکھیں گے۔ نوجوان عالم دین مولانا روح اللہ رضوی کا شرکائے جلسہ سے خطاب کہنا تھا کہ چہلم کے مرکزی عظیم الشان اجتماع میں ہم سب کا جمع ہونا جہاد کی حیثیت رکھتا ہے، یہ عوامی اجتماعات پاک سرزمین سے امریکا کو نکال باہر کرینگے، جہاد تبین یعنی بیانیے کا جہاد اہم ترین عمل ہے۔
مقررین نے امتِ مسلمہ کے عظیم رہنما شہید آیت اللہ سید علی خامنہ ای سمیت فلسطین اور لبنان کے شہدائے راہِ مقاومت کو زبردست خراجِ عقیدت پیش کیا۔ مرکزی عظیم الشان جلسہ کے دوران موجودہ رہبرِ معظم سید مجتبیٰ خامنہ ای سے تجدیدِ عہد اور ان کی قیادت پر بھرپور اعتماد کا اظہار کیا گیا۔ شرکاء نے اس عزم کا اعادہ کیا کہ مقاومت کے مشن کو ہر سطح پر آگے بڑھایا جائے گا۔ مقررین نے اپنے خطابات میں کہا کہ امت مسلمہ کو درپیش چیلنجز کا مقابلہ صرف اتحاد اور مشترکہ حکمت عملی سے ہی ممکن ہے، وقت کا تقاضا ہے کہ مسلم دنیا ایک پلیٹ فارم پر جمع ہو کر عالمی استکباری قوتوں کا مقابلہ کرے۔ عظیم الشان اجتماع میں دستہ امامیہ کراچی ڈویژن کے مرکزی صاحب بیاض سید عاطر حیدر، معروف منقبت و نوحہ خواں سید شادمان رضا و دیگر نے ترانہ شہادت پیش کئے۔
The post نشترپارک میں بیادشہید رہبرامام خامنہ ای ؒتاریخی اجتماع،امریکی سفارت خانوں کی بندش اور سفیر کی ملک بدری کا مطالبہ appeared first on شیعہ نیوز پاکستان.
