شیعہ نیوز: ایم ڈبلیو ایم پاکستان کے پارلیمانی لیڈر و رکنِ قومی اسمبلی انجینئر حمید حسین طوری نے وفاقی وزیر برائے پارلیمانی امور ڈاکٹر طارق فضل چوہدری سے ان کے دفتر اسلام آباد میں اہم ملاقات کی۔ملاقات کے دوران ضلع کرم،ضلع اورکزئی، علاقہ بنگش اور ملک کے دیگر علاقوں سے تعلق رکھنے والے اُن پاکستانیوں کے مسئلے پر تفصیلی تبادلہ خیال کیا گیا، جنہیں حالیہ دنوں میں متحدہ عرب امارات سے بےدخل کیا جا رہا ہے۔
اس موقع پر انجینئر حمید حسین طوری نے کہا کہ اس وقت روزانہ کی بنیاد پر اُن کے حلقے اور ملک کے دیگر علاقوں سے تعلق رکھنے والے تارکینِ وطن کو زبردستی واپس بھیجا جا رہا ہے، جن کی تعداد ہزاروں میں پہنچ چکی ہے۔انہوں نے مزید کہا کہ متاثرہ افراد میں وہ لوگ بھی شامل ہیں جو کئی سالوں سے عرب امارات میں قانونی طور پر مقیم تھے، کاروبار کر رہے تھے اور بالخصوص ڈرائیونگ کے شعبے سے وابستہ تھے۔ ان کے مطابق یہ اقدام نہ صرف عالمی قوانین بلکہ انسانی حقوق کی بھی سنگین خلاف ورزی ہے۔
ایم این اے انجینئر حمید حسین طوری نے حکومتِ پاکستان سے مطالبہ کیا کہ اس صورتحال کا فوری نوٹس لیا جائے، بےدخلی کے اس عمل کو رکوایا جائے اور متاثرہ افراد کی بحالی کے ساتھ ساتھ انہیں مناسب معاوضہ (کمپنسیشن) فراہم کیا جائے۔اس موقع پر وفاقی وزیر ڈاکٹر طارق فضل چوہدری نے یقین دہانی کراتے ہوئے کہا کہ اوورسیز پاکستانی ملک کا قیمتی اثاثہ ہیں اور حکومت ان کے مسائل سے بخوبی آگاہ ہے۔
یہ بھی پڑھیں : مزاحمت جاری رہے گی، جنگ کے دوران دشمن کے ساتھ مذاکرات ممکن نہیں، حزبالله
انہوں نے کہا کہ وزارتِ خارجہ،اوورسیز منسٹری اور وزارت قانون کے ذریعے اس معاملے کو متحدہ عرب امارات کے ساتھ مؤثر انداز میں اٹھایا جائے گا تاکہ اس مسئلے کا جلد از جلد حل نکالا جا سکے۔ملاقات میں ایم این اے مرزا اختیار بیگ بھی موجود تھے ملاقات خوشگوار ماحول میں اختتام پذیر ہوئی، جس میں اس عزم کا اظہار کیا گیا کہ اوورسیز پاکستانیوں کے حقوق کے تحفظ کے لیے ہر ممکن اقدامات کیے جائیں گے۔
The post پارلیمانی لیڈر ایم ڈبلیوایم انجینئرحمید حسین کی وفاقی وزیر برائے پارلیمانی امور ڈاکٹر طارق فضل چوہدری سے ملاقات ،امارات سے بےدخل پاکستانیوں کے مسائل پر گفتگو appeared first on شیعہ نیوز پاکستان.
