شیعہ نیوز: بین الاقوامی ادارہ الباقر کے شعبہ تبلیغات مجلس علماء امامیہ پاکستان کے زیراہتمام تکریم شہدا و تجدید عہد کانفرنس جنوبی پنجاب کے شہر کوٹ ادو میں منعقد ہوئی، جس میں جنوبی پنجاب کے اضلاع بہاولپور، ملتان، راجن پور، ڈیرہ غازی خان، لیہ، بھکر، وہاڑی، خانیوال، کوٹ ادو اور مظفرگڑھ سے آئمہ جمعہ والجماعت، مبلغین امامیہ اور علمائے کرام نے شرکت کی۔ کانفرنس میں شہدائے مقاومت خصوصا شہید امت حضرت آیت اللہ العظمی سید علی خامنہ ای، شہید سید حسن نصراللہ اور دیگر شہدا کو بھرپور خراج عقیدت پیش کیا گیا اور ان کی دینی، فکری اور مزاحمتی خدمات کو سراہا گیا۔ مقررین نے ایران اور لبنان پر ہونے والی جارحیت کی سخت الفاظ میں مذمت کرتے ہوئے اسے ملت اسلامیہ کے خلاف جارحیت قرار دیا اور اتحادِ امت، بیداری اور مزاحمت کے تسلسل کو وقت کی اہم ترین ضرورت قرار دیا۔
کانفرنس سے خطاب کرتے ہوئے مجلس وحدت مسلمین پاکستان جنوبی پنجاب کے صدر حجتہ الاسلام و المسلمین علامہ قاضی نادر حسین علوی نے اپنے خطاب میں شہید امت امام سید علی خامنہ ای کی علمی، فکری اور انقلابی خدمات کو خراج تحسین پیش کیا۔ انہوں نے کہا کہ امام خامنہ ای نے امت مسلمہ میں وحدت، بیداری اور استقامت کی نئی روح پیدا کی اور عالمی استکبار کے مقابلے میں مزاحمتی محاذ کو مضبوط بنیادیں فراہم کیں۔ انہوں نے آیت اللہ سید مجتبی خامنہ ای کے ساتھ تجدید عہد کرتے ہوئے کہا کہ تمام تر فکری و نظری اختلافات کے باوجود رہبر انقلاب کی قیادت میں اتحاد، وحدت اور یکجہتی کا پیغام پوری قوت کے ساتھ آگے بڑھایا جاتا رہے گا۔ انہوں نے 13 جون کو مینار پاکستان لاہور میں منعقد ہونے والی شہید امت کانفرنس کو ایک عظیم قومی و ملی اجتماع قرار دیتے ہوئے جنوبی پنجاب کے تمام اضلاع سے بھرپور شرکت کے عزم کا اظہار کیا۔
بزرگ عالم دین دارلعلوم محمدیہ سرگودھا کے پرنسپل اور مجلس علما امامیہ کے مرکزی رہنما علامہ ملک نصیر حسین نے خطاب کرتے ہوئے شہید سید حسن نصراللہ کی قیادت، مزاحمتی جدوجہد اور لبنان میں بین المسالک ہم آہنگی کے فروغ پر تفصیلی روشنی ڈالی۔ انہوں نے کہا کہ شہید سید حسن نصراللہ نے مختلف طبقات کو قریب لانے اور داخلی وحدت قائم کرنے میں کلیدی کردار ادا کیا۔انہوں نے مزید کہا کہ حزب اللہ لبنان نے ان کی قیادت میں نہ صرف دفاعی و سیاسی میدان میں استحکام حاصل کیا بلکہ خطے میں استعماری قوتوں کے مقابلے میں مزاحمتی محاذ کو نئی توانائی بھی فراہم کی۔
یہ بھی پڑھیں : پاکستان خطے میں ایران امریکہ تنازع کے حل کیلئے کردار ادا کر رہا ہے، وزیر اعظم شہباز شریف
بعد ازاں ممتاز عالم دین اور بین الاقوامی ادارہ الباقر کے ڈائیریکٹر تعلقات عامہ و تربیت علامہ ڈاکٹر سید جاوید حسین شیرازی نے خطاب کرتے ہوئے شہید امت امام سید علی خامنہ ای کی فکری، روحانی اور اسٹریٹجک خدمات پر تفصیلی گفتگو کی۔ انہوں نے کہا کہ امام خامنہ ای نے عالمی سطح پر امت مسلمہ کے اتحاد، بین المسالک ہم آہنگی اور فکری یگانگت کے فروغ کے لیے عملی اقدامات کیے۔ انہوں نے کہا کہ دفاعی میدان میں ان کی حکمت عملی کے باعث ایران نے غیرمعمولی پیش رفت کی اور جدید دفاعی صلاحیتوں کی بدولت عالمی دباو کے باوجود مضبوطی کے ساتھ کھڑا ہے۔علامہ ڈاکٹر سید جاوید حسین شیرازی نے کہا کہ امام خامنہ ای کی روحانی وابستگی اہل بیت خصوصا حضرت فاطمہ زہرا سلام اللہ علیہا اور حضرت عباس سے ان کی معنوی شخصیت کا نمایاں پہلو تھا، جس نے ان کی شخصیت کو روحانی قوت عطا کی۔ انہوں نے کہا کہ ان کی شہادت نے انقلاب اسلامی کو نئی توانائی دی اور دنیا بھر میں مزاحمتی تحریکوں کو تازہ حوصلہ ملا۔
کانفرنس سے مجلس علماء امامیہ پاکستان کے مدیر علامہ ضیغم عباس نے خطاب کرتے ہوئے کہا کہ موجودہ دور میں علما کی ذمہ داری ہے کہ وہ عوامی شعور کو صحیح سمت دیں اور بیداری و تبیین کے عمل کو موثر بنائیں۔ کانفرنس کے اختتام پر شہدائے اسلام و مقاومت کے لیے خصوصی دعا کی گئی جبکہ ایران، لبنان، فلسطین اور دیگر مظلوم خطوں پر امریکہ و اسرائیل کی جارحیت کی شدید مذمت کی گئی۔ شرکا نے امت مسلمہ کے اتحاد، مظلوم اقوام کی حمایت اور مزاحمتی محاذ کی بھرپور تائید و حمایت کے عزم کا اعادہ کیا۔ شرکا نے ایران پر جارحیت کے بعد پاکستان کی جانب سے خطے میں امن کی بحالی کی کوششوں کا خیر مقدم کیا اور 13 جون مینار پاکستان پر منعقدہ شہید امت کانفرنس میں بھرپور شرکت کے عزم کا اعادہ کیا۔
The post مجلس علما امامیہ پاکستان کے زیراہتمام تکریم شہدا و تجدید عہد کانفرنس کا انعقاد، علماء کی بڑی تعداد شریک appeared first on شیعہ نیوز پاکستان.
