شیعہ نیوز: مجلس وحدت مسلمین پاکستان کے مرکزی چیف آرگنائزر سید ناصر عباس شیرازی کی قیادت میں ایک اعلیٰ سطحی وفد نے جماعت اسلامی بلوچستان کے نائب امیر، ملی یکجہتی کونسل بلوچستان کے رہنماء مولانا ڈاکٹر عطاء الرحمٰن سے ملاقات کی اور ان کے بھائی کی وفات پر دلی تعزیت اور افسوس کا اظہار کیا۔ اس موقع پر سفیر مسجد کے خطیب ممتاز اہل سنت عالم دین قاری عبدالرحمٰن بھی موجود تھے۔ وفد میں مجلس وحدت مسلمین پاکستان کے رہنماء علامہ مقصود علی ڈومکی، مجلس علماء مکتب اہل بیت پاکستان کے رہنماء امام جمعہ کوئٹہ علامہ سید ہاشم موسوی، صوبائی آرگنائزر علامہ ولایت حسین جعفری، صوبائی صدر ایم ڈبلیو ایم بلوچستان علامہ سہیل اکبر شیرازی سمیت دیگر رہنماء شامل تھے۔
ملاقات کے دوران باہمی اخوت، امت مسلمہ کے اتحاد اور استعماری قوتوں کے خلاف مشترکہ جدوجہد کے موضوعات پر گفتگو کی گئی۔ اس موقع پر گفتگو کرتے ہوئے سفیر مسجد کے خطیب قاری عبدالرحمن نے کہا کہ میں رہبر معظم حضرت آیت اللہ شہید سید علی خامنہ ای کی بیعت میں ہوں اور وہ میرے رہبر و رہنماء ہیں۔ انہوں نے امت مسلمہ کے اتحاد، بیداری، عزت و وقار اور استقامت کے لئے جو عظیم جدوجہد کی اور جس انداز میں شہادت پائی، وہ پوری امت مسلمہ کے لیے مشعلِ راہ ہے۔ انہوں نے کہا کہ ہم سب کی دلی خواہش ہے کہ رہبرِ شہید کی نماز جنازہ اور تدفین میں شریک ہوں اور اس عظیم قائد کو خراج عقیدت پیش کریں، جنہوں نے اپنی پوری زندگی خدا کے دین کی سربلندی، مظلوم فلسطینی عوام کی حمایت اور ظالم استکباری قوتوں کے خلاف جدوجہد میں صرف کر دی۔
جماعت اسلامی بلوچستان کے نائب امیر مولانا ڈاکٹر عطاء الرحمن نے گفتگو کرتے ہوئے کہا کہ حضرت امام خمینی رحمۃ اللہ علیہ کے کوئٹہ میں نمائندے آقا فاضل مرحوم سے لے کر ہمارا تعلق انقلابِ اسلامی ایران اور رہبرِ انقلاب کے ساتھ ہمیشہ قائم رہا ہے۔ امت مسلمہ کے اتحاد، بیداری اور استعماری قوتوں کے خلاف مزاحمت کے لئے انقلابِ اسلامی نے جو کردار ادا کیا، وہ ناقابلِ فراموش ہے۔ مجلس وحدت مسلمین پاکستان کے مرکزی چیف آرگنائزر علامہ سید ناصر عباس شیرازی نے کہا کہ شیعہ اور سنی اسلام کے دو توانا بازو ہیں، اور ہمیں متحد ہو کر وقت کے فرعونوں اور یزیدی قوتوں کا مقابلہ کرنا ہے۔ امت مسلمہ کی نجات فرقہ واریت میں نہیں بلکہ اتحاد، اخوت اور مشترکہ جدوجہد میں ہے۔
اس موقع پر علامہ مقصود علی ڈومکی نے کہا کہ امت مسلمہ کو فکری و عملی وحدت کی ضرورت ہے اور علماء و دینی قیادت کا فرض ہے کہ وہ نوجوان نسل کو اتحاد، مزاحمت اور اسلامی اقدار کے تحفظ کا شعور دیں۔ امام جمعہ کوئٹہ علامہ سید ہاشم موسوی نے کہا کہ علمائے کرام اور دینی جماعتوں کے درمیان روابط کا فروغ وقت کی اہم ضرورت ہے تاکہ پاکستان میں بین المسالک ہم آہنگی، امن اور بھائی چارے کو مزید مضبوط بنایا جا سکے۔ صوبائی آرگنائزر علامہ ولایت حسین جعفری اور صوبائی صدر علامہ سہیل اکبر شیرازی نے بھی مولانا ڈاکٹر عطاء الرحمٰن سے اظہارِ تعزیت کرتے ہوئے مرحوم کے درجات کی بلندی اور لواحقین کے لیے صبر جمیل کی دعا کی۔ ملاقات کے اختتام پر مرحوم کے ایصالِ ثواب، امت مسلمہ کے اتحاد، فلسطین کی آزادی اور پاکستان کے امن و استحکام کے لیے خصوصی دعا بھی کی گئی۔
The post ایم ڈبلیو ایم پاکستان کے وفد کی کوئٹہ میں مولانا ڈاکٹر عطاء الرحمٰن سے ملاقات و اظہار تعزیت appeared first on شیعہ نیوز پاکستان.
