شیعہ نیوز: وفاق المدارس الشیعہ پاکستان کے نائب صدر علامہ سید مرید حسین نقوی نے کہا ہے کہ معاہدہ ابراہیمی دراصل اسلام کی توہین کا منصوبہ ہے، جسے کوئی اسلامی ملک تسلیم نہیں کرے گا، ابراہیمی معاہدے کو مسترد کرکے سعودی رہنما محمد بن سلیمان نے اچھا کردار ادا کیا ہے، ٹرمپ کی کال سننے والے باقی ممالک کے سربراہان کی زبان سے کوئی لفظ نہیں نکلا، میڈیا والے وضاحتیں کر رہے ہیں کہ چپ بھی مخالفت ہوتی ہے، حالانکہ چپ رضایت بھی ہوتی ہے، راضی ہونا بھی چپ ہی ہے۔ محمد بن سلیمان کا اعلان کہ جب تک مستقل فلسطینی ریاست نہیں بنائی جاتی، ابراہیمی معاہدے پر دستخط نہیں کریں گے، قابل تحسین ہے۔ جامع مسجد علی حوزہ علمیہ جامعتہ المنتظر ماڈل ٹاون لاہور میں اجتماع سے خطاب کرتے ہوئے علامہ مرید نقوی نے کہا اسرائیل تسلیم کروانے کا امریکی منصوبہ کامیاب نہیں ہوگا، ان شاءاللہ میں اور آپ زندہ رہے تو جلد غاصب صیہونی ریاست اسرائیل کا خاتمہ دیکھیں گے۔ امریکی صدر ڈونلڈ ٹرمپ خدا بنا ہوا ہے، بیٹھے بیٹھے اعلان کر دیتا ہے کہ فلاں ملک امریکہ کا ہو گیا ہے، میری حکومت چل گئی ہے، کوئی ایسا کام نہیں ہوگا جس سے قتل و غارت ہو۔
یہ بھی پڑھیں : ہم دشمن کے وعدوں پر بھروسہ نہیں کرتے، محمد باقر قالیباف
انہوں نے کہا کہ امریکہ جس ملک میں بھی امن قائم کرنا چاہے یا بدامنی اس کی مرضی پر منحصر ہے، جمہوریت اور بادشاہت اس کی جیب میں ہے، کسی کو دہشتگرد بنانا ہے، کسی کو اقتدار میں لانا ہے، کسی کو اقتدار سے ہٹانا، سب اس کے اختیار میں ہے۔وینزویلا اور شام میں آپ دیکھ لیں کیا ہوا۔ جس شخص نے سیدہ زینب بنت علی سلام اللہ علیہا، جناب رقیہ بنت علی سلام اللہ علیہا، جناب فضہ اور جناب سکینہ سلام اللہ علیہا کے مزارات مقدسہ کی توہین کی اُس شخص کے بارے میں حال ہی میں امریکی صدر نے اقرار کیا کہ شام کے اقتدار پر اسے ہم نے بٹھایا ہے، یہ ہمارا بندہ ہے، یہی شخص ایک عرصہ پہلے یہ امریکی فہرست میں دہشتگرد تھا، اس کے سر کی قیمت مقرر تھی، اب وہ امریکہ کا بندہ بن گیا ہے، تو کوئی مسئلہ نہیں رہا، کیونکہ وہ اسرائیل کے تحفظ میں کام آ رہا ہے۔ اسی طرح سعودی عرب، بحرین، قطر، کویت میں بہترین بادشاہی حکومتیں چل رہی ہیں، اسے کوئی مسئلہ نہیں۔ کسی اور ملک میں جب حملہ کرنا ہو تو کہتے ہیں یہاں جمہوریت نہیں، عرب ممالک میں سال ہا سال سے بادشاہی ہے، بادشاہت ہے تو وہاں جمہوریت ہے، جب چاہے گا ان کا بھی خاتمہ کر دے گا۔
The post معاہدہ ابراہیمی دراصل اسلام کی توہین کا منصوبہ ہے، جسے کوئی اسلامی ملک تسلیم نہیں کرے گا، علامہ مرید حسین نقوی appeared first on شیعہ نیوز پاکستان.
