پاکستان میں داعش کا اصل چہرہ بے نقاب: لشکرِ جھنگوی اور سپاہِ صحابہ کی حقیقت سامنے آ گئی
پاکستان میں بڑھتی ہوئی دہشت گردی اور فرقہ وارانہ شدت پسندی کے پس منظر میں یہ انکشاف ہوا ہے کہ کالعدم لشکرِ جھنگوی اور کالعدم سپاہِ صحابہ ہی دراصل داعش کی حقیقی شکل ہیں۔ سکیورٹی ذرائع کے مطابق، یہ دونوں گروہ پاکستان کے اندر داعش کے نظریاتی و عملی ایجنڈے کو فروغ دینے میں سرگرم کردار ادا کر رہے ہیں۔
ان دہشت گرد تنظیموں نے داعش کی طرز پر تنظیمی ڈھانچہ، خفیہ سیلز، اور سہولت کاری کے نیٹ ورکس قائم کر رکھے ہیں، جو ملک میں جاری خودکش حملوں، ٹارگٹ کلنگ، اور سکیورٹی فورسز پر حملوں میں ملوث ہیں۔
ذرائع کا کہنا ہے کہ ان گروہوں نے داعش کے نظریات کو مقامی رنگ دے کر پاکستان کے مختلف شہروں میں شدت پسندی کو پھیلانے کی کوشش کی۔ لشکرِ جھنگوی اور سپاہِ صحابہ کے عسکری و مالی روابط افغانستان، شام اور دیگر دہشت گرد نیٹ ورکس سے بھی جڑے ہوئے ہیں۔
ماہرین کے مطابق، ان گروہوں کا اصل مقصد پاکستان میں مذہبی منافرت کو ہوا دینا اور ریاستی اداروں کے خلاف بغاوت کو ابھارنا ہے، تاکہ داعش کے لیے ایک اندرونی اڈہ قائم کیا جا سکے۔
ذرائع کے مطابق، انہی گروہوں نے طالبان اور خوارج کو پاکستان میں مضبوط کیا اور ریاستی اداروں کے خلاف نفرت انگیز مہمات کو فروغ دیا۔ ان کی مدد سے دہشت گرد عناصر کو لوجسٹک سہولتیں، نقل و حمل کے راستے، اور مالی وسائل فراہم کیے گئے، جس سے ملک کے اندر دہشت گرد نیٹ ورک مضبوط ہوا اور فوج و سکیورٹی اداروں پر حملوں میں اضافہ ہوا۔
سکیورٹی ماہرین کا کہنا ہے کہ ان اندرونی سہولت کاروں کے خلاف ریاستی سطح پر سخت کارروائیاں ناگزیر ہو چکی ہیں، کیونکہ یہ گروہ پاکستان کے دشمن ایجنڈے کو عملی شکل دے رہے ہیں۔
