شیعہ نیوز: مجلس وحدت مسلمین سندھ کے صوبائی صدر علامہ مقصود علی ڈومکی سے ممتاز قبائلی و سماجی شخصیت میر حاجی خان ڈومکی نے اپنے وفد کے ہمراہ ملاقات کی۔ بعد ازاں قبیلے کے معززین اور ڈومکی اتحاد کے مرکزی رہنماء حاجی شاہ مراد خان ڈومکی، استاد عبدالفتاح خان ڈومکی، احمد علی ٹالانی، رحم دل خان ٹالانی، منصب علی ڈومکی، استاد رفیق احمد اور دیگر شخصیات نے بھی علامہ مقصود ڈومکی سے ملاقات کی۔ ملاقات کے دوران موجودہ صورتحال، قبائلی امور، سماجی مسائل اور محرم الحرام کے حوالے سے تبادلہ خیال کیا گیا۔
اس موقع پر علامہ مقصود علی ڈومکی نے گفتگو کرتے ہوئے کہا کہ 16 جون کو منعقد ہونے والی “پیغامِ کربلا کانفرنس” میں مختلف سیاسی، سماجی، مذہبی اور قبائلی رہنماء شرکت کریں گے اور نواسۂ رسول حضرت امام حسین علیہ السلام اور شہدائے کربلا کی عظیم، لازوال اور بے مثال قربانی کو خراج عقیدت پیش کریں گے۔ انہوں نے کہا کہ کربلا کا پیغام انسانیت کی عزت و سربلندی، حق و صداقت، حریت و آزادی، صبر و استقامت اور ظلم و جبر کے خلاف ڈٹ جانے کا پیغام ہے۔ آج کے دور میں بھی واقعۂ کربلا پوری انسانیت کے لئے مشعل راہ ہے اور ہمیں امام حسین علیہ السلام کے افکار اور تعلیمات کو نئی نسل تک پہنچانے کی ضرورت ہے۔
یہ بھی پڑھیں : شہید رہبر کی قربانی سے پیدا ہونے والی یہ تاریخی فرصت امت کے اتحاد، عزت اور سربلندی کا ذریعہ بن چکی ہے، امین شیرازی
بعد ازاں علامہ مقصود علی ڈومکی نے گوٹھ سولنگی پہنچ کر قبائلی و سماجی شخصیات لیاقت علی سولنگی، محمد حسین رند، ارشاد علی سولنگی، یاسر علی رند، نواب سولنگی اور دیگر معززین سے ملاقات کی۔ ملاقات کے دوران ماہ محرم الحرام کے انتظامات، مجالس عزاء، عزاداری سید الشہداء علیہ السلام اور اتحاد بین المسلمین کے فروغ کے حوالے سے تبادلہ خیال کیا گیا۔ علامہ مقصود علی ڈومکی نے کہا کہ محرم الحرام ہمیں صبر، ایثار، قربانی اور حق کی خاطر ہر قسم کی مشکلات برداشت کرنے کا درس دیتا ہے۔ حضرت امام حسین علیہ السلام نے میدانِ کربلا میں دین اسلام کی بقا، انسانی اقدار کے تحفظ اور ظلم کے خلاف قیام کی ایسی مثال قائم کی جو رہتی دنیا تک انسانیت کی رہنمائی کرتی رہے گی۔
The post کربلا کا پیغام انسانیت کی عزت و سربلندی، حق و صداقت، حریت و آزادی، صبر و استقامت اور ظلم و جبر کے خلاف ڈٹ جانے کا پیغام ہے،علامہ مقصودڈومکی appeared first on شیعہ نیوز پاکستان.
