شیعہ نیوز: تحریک بیدارئ امت مصطفیٰ کے سربراہ علامہ سید جواد نقوی مینار پاکستان پر شہیدِ امت کانفرنس سے خطاب کے دوران کہا ہے کہ یہ عظیم الشان کانفرنس اجتماعی شعور، قومی یکجہتی اور فکری بیداری کا اظہار ہے۔ یہ ان تمام طبقات کو خراجِ تحسین پیش کرنے کی کوشش ہے جنہوں نے حق، انصاف اور مظلومیت کے ساتھ کھڑے ہونے کا حوصلہ دکھایا اور یہ اس امر کا اعلان بھی ہے کہ پاکستان کے عوام عالمی ضمیر کی اس بیداری کا حصہ ہیں جو ظلم کے خلاف اور انسانی وقار کے حق میں جنم لے رہی ہے، رہبرِ شہید کا مکتب صرف ایک فکر نہیں بلکہ ایک عملی راستہ ہے جس کا بنیادی اصول ’’حضورِ میدان‘‘ ہے، میدانِ دفاع ہو، مزاحمت ہو یا خدمت، ہر اس جگہ جہاں حق کا تقاضا ہو، امت کی موجودگی ضروری ہے، رہبرِ شہید نے اپنی زندگی اور پھر اپنی قربانی کے ذریعے امت کو یہی پیغام دیا اور لوگوں کو دوبارہ میدانِ عمل میں واپس لے آئے، آج ملتِ ایران اسی استقامت، بیداری اور حضورِ میدان کی عملی تصویر بن کر کھڑی ہے۔
یہ بھی پڑھیں : رہبر کی شہادت کا سب سے بڑا پیغام یہی ہے کہ امتِ مسلمہ اپنی مصنوعی تقسیموں سے بلند ہو، مشترک اقدار کے گرد جمع ہو،علامہ راجہ ناصرعباس
انہوں نے مزید کہا کہ حالیہ علاقائی صورتحال اور خطے کی کشیدگی کے دوران پاکستانی قیادت نے سفارت کاری، تدبر اور ثالثی کے ذریعے ایک مثبت اور باوقار کردار ادا کیا ہے، بعض عالمی قوتیں پاکستان کو اپنے مضموم مقاصد کے لیے استعمال کرنا چاہتی تھیں لیکن پاکستانی قیادت نے بصیرت اور سیاسی پختگی کا مظاہرہ کرتے ہوئے محاذ آرائی کے بجائے سفارت کاری کا راستہ اختیار کیا، جس کے نتیجے میں عالمی سطح پر پاکستان کے وقار، احترام اور اہمیت میں اضافہ ہوا۔ انہوں نے کہا کہ حکومت نے اپنے حصے کا کردار ادا کرکے پاکستان کی عزت اور مقام کو بلند کیا ہے، اب عوام کی ذمہ داری ہے کہ وہ اپنے نظم، شعور، اتحاد اور ذمہ دارانہ طرزِ عمل سے دنیا کے سامنے ایک باوقار، باشعور اور منظم ملت کا نمونہ پیش کریں۔
The post رہبرِ شہید آیت اللہ خامنہ ای ـؒ کا مکتب صرف ایک فکر نہیں بلکہ ایک عملی راستہ ہے، علامہ جواد نقوی appeared first on شیعہ نیوز پاکستان.
