شیعہ نیوز: اپوزیشن لیڈر سینیٹ آف پاکستان اور چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے پارلیمنٹ ہاؤس کے باہر میڈیا سے گفتگو کرتے ہوئے کہا کہ ماہِ محرم الحرام تمام مسلمانوں کا مشترکہ ورثہ ہے۔ امام حسینؑ اور اہلِ بیتِ رسولؐ سے محبت و عقیدت ہر مسلمان کے ایمان کا حصہ ہے، لہٰذا حکومت کی ذمہ داری ہے کہ عزاداروں کو مکمل تحفظ اور تمام ضروری سہولیات فراہم کرے۔
انہوں نے کہا کہ محرم الحرام سے قبل متعدد شخصیات کو بلاجواز شیڈول فور میں شامل کرنا اور پابندیاں عائد کرنا تشویشناک عمل ہے، خصوصاً ایسی شخصیات کے خلاف کارروائیاں جو ہمیشہ امن، اتحاد اور بھائی چارے کا پیغام دیتی رہی ہیں۔
علامہ راجہ ناصر عباس جعفری نے کہا کہ چار دیواری کے اندر مجالس کے انعقاد کے لیے کسی اجازت کی ضرورت نہیں اور اس حوالے سے لاہور ہائی کورٹ کا واضح فیصلہ موجود ہے، مگر اس کے باوجود مجالس کے منتظمین اور بانیان کے خلاف مقدمات درج کیے جا رہے ہیں جو بنیادی آئینی اور مذہبی حقوق کی خلاف ورزی ہے۔
انہوں نے کہا کہ محرم الحرام کے مقدس ایام میں پاکستان دشمن عناصر فرقہ واریت اور نفرت کو ہوا دینے کی کوشش کرتے ہیں، لیکن باشعور اور محب وطن پاکستانی ایسے عزائم کو کبھی کامیاب نہیں ہونے دیں گے۔ اتحادِ امت کو نقصان پہنچانے والے عناصر کے خلاف مؤثر اقدامات ناگزیر ہیں۔
چیئرمین مجلس وحدت مسلمین نے کہا کہ رہبرِ معظم آیت اللہ سید علی الحسینی خامنہ ای کی المناک شہادت کے بعد امتِ مسلمہ میں غیر معمولی وحدت اور یکجہتی دیکھنے میں آئی ہے۔ اس وحدت کا تحفظ وقت کی اہم ضرورت ہے اور پوری امت کو دشمن کے ناپاک عزائم کے مقابلے میں متحد رہنا ہوگا۔
یہ بھی پڑھیں : امریکہ اور اسرائیل کی ایران کے خلاف جارحانہ جنگ کے خاتمے کا سمجھوتہ ” اسلام آباد مفاہمت نامہ” کا مکمل متن
گلگت بلتستان کی سیاسی صورتحال پر گفتگو کرتے ہوئے انہوں نے کہا کہ وہاں عوامی مینڈیٹ پر ڈاکا ڈالا گیا ہے۔ اگر یہی طرزِ عمل جاری رہا تو عوام اپنے حقوق کے تحفظ کے لیے منظم ردعمل دینے پر مجبور ہوں گے۔ ہمارا مطالبہ صرف یہ ہے کہ قانون سب کے لیے برابر ہو اور کوئی بھی فرد یا ادارہ قانون سے بالاتر نہ ہو۔
انہوں نے کہا کہ عوامی مینڈیٹ کے احترام، جمہوری اقدار کے تحفظ اور آئین و قانون کی بالادستی کا مطالبہ ہرگز ملک دشمنی یا انتہا پسندی نہیں بلکہ ایک جمہوری اور آئینی حق ہے۔
علامہ راجہ ناصر عباس جعفری نے حکومت اور متعلقہ اداروں سے مطالبہ کیا کہ عوامی رائے کا احترام کیا جائے، آئینی حقوق کا تحفظ یقینی بنایا جائے اور ایسے اقدامات سے اجتناب کیا جائے جو عوام میں بے چینی اور بداعتمادی کو فروغ دیں۔
The post عوامی رائے، آئینی حقوق اور اتحادِ امت کا احترام ناگزیر ہے، سینیٹر علامہ راجہ ناصر عباس جعفری appeared first on شیعہ نیوز پاکستان.
