شیعہ نیوز: وزیراطلاعات پنجاب عظمیٰ بخاری نے کہا ہے کہ ٹی ایل پی پر پابندی کا فیصلہ واپس نہیں ہوگا۔ ایک نجی ٹی وی چینل کے پروگرام میں گفتگو کرتے ہوئے عظمیٰ بخاری کا کہنا تھا کہ ٹی ایل پی سیاسی جماعت نہیں تھی، ہمیں اس مائنڈ سیٹ کے خلاف لڑنا ہے۔ اُنہوں نے کہا کہ ریاست نے جو فیصلہ کیا ہے وہ واپس نہیں ہو گا، ٹی ایل پی سے متعلق ریاست کے فیصلے پر عمل ہو گا، سیاسی جماعتوں کا کام امن و امان خراب کرنا نہیں ہوتا۔
وزیر اطلاعات پنجاب کا کہنا تھا کہ ٹی ایل پی جماعت نہیں ایک انتہا پسند گروپ ہے، ہمارا مذہب یہ اجازت نہیں دیتا کسی کو بھی قتل کر دیں، تحریک انصاف نے 9 مئی کو جلاؤ گھیراؤ کیا، کسی اور جماعت پر پابندی لگانے کی بات کہیں ڈسکس نہیں ہورہی ہے۔ عظمیٰ بخاری نے کہا کہ سعد رضوی اور ان کے بھائی پنجاب میں نہیں ہیں، ہمیں پتا ہے کہ سعد رضوی اور ان کے بھائی کہاں ہیں، ٹی ایل پی تنظیم کی آڑ میں منی لانڈرنگ کررہی تھی۔
اُن کا کہنا تھا کہ وزیراعلیٰ خیبر پختونخوا اڈیالہ کے مجاور بنے ہوئے ہیں، اُن کے صوبے میں آگ لگی یہ وہاں کیوں نہیں جاتے، سہیل آفریدی کی بانی سے ملاقات ہو جائے گی۔ اتحادی جماعت سے اختلاف کے حوالے سے سوال کے جواب میں وزیر اطلاعات پنجاب نے کہا کہ ہماری طرف سے سیز فائر ہے مگر پیپلزپارٹی کی طرف سے بیانات آ رہے ہیں، اگر پیپلزپارٹی کی لیڈرشپ نوٹس نہیں لے گی تو پھر مجھے جواب دینا پڑے گا۔
The post کالعدم ٹی ایل پی تنظیم کی آڑ میں منی لانڈرنگ کررہی تھی، حکومت پنجاب appeared first on شیعہ نیوز پاکستان.
