شیعہ نیوز: حماس کے رہنما عبد الرحمن شدید نے کہا ہے کہ رام اللہ کے مشرق میں واقع گاؤں المغیر اور مغربی کنارے کے دیگر دیہات و قصبوں میں آباد کاروں کے جتھوں کے حملے، جن میں لوٹ مار، چوری، تشدد، املاک کو نشانہ بنانا اور شہریوں و بچوں پر براہِ راست فائرنگ شامل ہے، منظم دہشت گردی اور سفاکیت کی ایک خطرناک سطح کی عکاسی کرتے ہیں۔ یہ سب کچھ قابض فوج اور آباد کاروں کے گینگ کے درمیان مکمل شراکت داری کا نتیجہ ہے، جس کا مقصد ہمارے لوگوں کو ان کی زمین سے جڑ سے اکھاڑ پھینکنا اور نقل مکانی پر مجبور کرنا ہے۔
عبد الرحمن شدید نے ایک پریس بیان میں مغربی کنارے میں بڑھتے ہوئے حملوں کی سنگینی سے خبردار کرتے ہوئے کہا کہ قابض حکومت کا آباد کاروں کو تحفظ اور کور فراہم کرنا اور انہیں دیہاتوں پر حملہ کرنے اور شہریوں کی زمینوں و املاک کو تباہ کرنے کا گرین سگنل دینا، اسرائیل اور اس کے آباد کاروں کے لیے خوف، دہشت اور ناکامی کے سوا کچھ نہیں لائے گا۔ انہوں نے اس بات پر زور دیا کہ ہمارا عوام الحاق اور نقل مکانی کے تمام منصوبوں سے زیادہ طاقتور ہے۔
یہ بھی پڑھیں : اسرائیلی قیادت کا ایران مخالف امریکی سینیٹر لنڈسے گراہم کی موت پر اظہار افسوس
انہوں نے گاؤں المغیر اور دیگر تمام نشانہ بننے والے علاقوں کے رہائشیوں کے عزم اور مسلسل حملوں کے خلاف ان کی استقامت کو سراہا۔ انہوں نے زور دے کر کہا کہ مغربی کنارے کے تمام علاقوں میں شہریوں کا اپنے گھروں اور زمینوں سے وابستہ رہنا، یہودیت کے منصوبوں اور بستیوں کے پھیلاؤ کے سامنے ایک قومی محاذ اور مضبوط دیوار ثابت ہو رہا ہے۔
انہوں نے مغربی کنارے میں ہمارے عوام سے اپیل کی کہ وہ باہمی تعاون اور عوامی حمایت کی کیفیت کو مضبوط بنائیں، تحفظ کی کمیٹیوں کو فعال کریں، میدانی موجودگی کو وسیع کریں اور آباد کاروں کے حملوں کا مقابلہ کریں، تاکہ کوئی بھی گاؤں یا خاندان اکیلے اس دہشت گردی کا سامنا نہ کرے۔
حماس کے رہنما نے اس بات پر زور دیا کہ قابض فوج اور آباد کاروں کے جرائم ہمارے عوام کو ان کی زمین سے دور نہیں کر سکتے۔ انہوں نے کہا کہ جارحیت میں اضافہ مزید اتحاد، استقامت اور زمین و عوام کے تحفظ کے لیے مزاحمت کا متقاضی ہے، اور اس کے ساتھ ساتھ اسرائیل کو لگام ڈالنے اور اس کے مجرم رہنماؤں کے احتساب کے لیے عرب، اسلامی اور بین الاقوامی سطح پر فوری کارروائی کی بھی ضرورت ہے۔
The post آباد کاروں کی دہشت گردی میں اضافہ، فلسطینی عوام جارحیت کے خلاف ڈٹ جائیں، حماس appeared first on شیعہ نیوز پاکستان.
