شیعہ نیوز: قائدِ حزبِ اختلاف سینیٹ آف پاکستان علامہ راجہ ناصر عباس جعفری سے سابق اسپیکر قومی اسمبلی و سیکرٹری جنرل تحریک تحفظ آئین پاکستان اسد قیصر کی سربراہی میں وفد نے ملاقات کی۔ وفد میں سینیٹر نور الحق قادری اور ممبر قومی اسمبلی شہرام خان ترکئی شامل تھے۔
ملاقات میں ترجمان تحریک تحفظ آئین پاکستان حسین احمد یوسفزئی، ڈاکٹر سید ناصر عباس شیرازی، چیف آرگنائزر مجلس وحدت مسلمین، سید محسن شہریار، ترجمان مجلس وحدت مسلمین، ظہیر عباس نقوی، مرکزی ڈپٹی جنرل سیکرٹری مجلس وحدت مسلمین اور مولانا مشرف حسینی بھی موجود تھے۔
ملاقات کے دوران افغان زیرِ تعلیم طلبہ کو میڈیکل تعلیمی اداروں سے PMDC کے ایک نوٹیفکیشن کے ذریعے خارج کیے جانے کے معاملے پر شدید تشویش کا اظہار کیا گیا۔
شرکاء نے کہا کہ افغان طلبہ پاکستان میں طویل عرصے سے اپنی میڈیکل تعلیم جاری رکھے ہوئے ہیں اور اچانک کسی نوٹیفکیشن کے ذریعے ان کے تعلیمی کیریئر کو متاثر کرنا نہ صرف ان کے مستقبل کے ساتھ ناانصافی ہے بلکہ اس کے پاک افغان برادرانہ تعلقات پر بھی سنگین اور منفی اثرات مرتب ہوں گے۔
یہ بھی پڑھیں: اگر ہم نے ایران کو تباہ نہ کیا ہوتا تو وہ 2 ماہ کے اندر جوہری ہتھیار حاصل کر لیتا، ڈونلڈ ٹرمپ
شرکاء نے مطالبہ کیا کہ افغان طلبہ کے تعلیمی مستقبل کو مدنظر رکھتے ہوئے PMDC کا مذکورہ نوٹیفکیشن فی الفور واپس لیا جائے اور زیرِ تعلیم طلبہ کو اپنی تعلیم مکمل کرنے کا موقع فراہم کیا جائے۔
ملاقات میں حکومت کی جانب سے پٹرولیم لیوی میں اضافے پر بھی شدید تشویش کا اظہار کیا گیا۔ شرکاء نے کہا کہ پٹرولیم مصنوعات پہلے ہی عام آدمی کی پہنچ سے باہر ہو چکی ہیں، ایسے میں پٹرولیم لیوی میں مزید اضافہ مہنگائی میں اضافے اور عوام پر مزید معاشی بوجھ کا باعث بنے گا۔
شرکاء نے حکومت سے مطالبہ کیا کہ پٹرولیم لیوی میں کیا گیا اضافہ فوری طور پر واپس لیا جائے اور عوام کو ریلیف فراہم کرنے کے لیے عملی اقدامات کیے جائیں۔
ملاقات میں اس امر پر اتفاق کیا گیا کہ عوامی مسائل، بالخصوص تعلیم، معاشی مشکلات اور پاک افغان تعلقات سے متعلق اہم معاملات کو پارلیمنٹ سمیت ہر آئینی و جمہوری فورم پر بھرپور انداز میں اٹھایا جائے گا۔
The post افغان طلبہ کا تعلیمی مستقبل متاثر کرنے والا PMDC نوٹیفکیشن فوری واپس لیا جائے، پٹرولیم لیوی میں اضافہ بھی مسترد appeared first on شیعہ نیوز پاکستان.
