شیعہ نیوز: اسلامی تحریک مزاحمت ’حماس‘ کے عسکری ونگ، القسام بریگیڈز نے ان نئی فوجی مشقوں کی جھلکیاں نشر کی ہیں جو ان کی بحری افواج نے طوفان الاقصیٰ کی جنگ سے قبل شمالی غزہ کی پٹی میں انجام دی تھیں۔
یہ مناظر القسام بریگیڈز کی طرف سے نشر کی جانے والی ایک ویڈیو کے ذریعے سامنے آئے، جس میں القسام بریگیڈز کے شمالی بریگیڈ میں بحریہ کے کمانڈر کے فرائض سرانجام دینے والے شہید فیلڈ کمانڈر رمزی رمضان حمید کی سوانح عمری کو دستاویزی شکل دی گئی ہے۔
ویڈیو کے دوران شہید حمید نے کہا کہ’’ہم نے اس مشق کا نام ’صواري الفاتحين‘ (فاتحین کے مستول) رکھا جو ہمارے بھائی ابو انس الغندور سے منسوب ہے، جنہوں نے اس مقام (سابقہ الواحہ سائٹ) کو ’محمد الفاتح‘ کا نام دیا تھا۔ یہ نام قسطنطنیہ میں محمد الفاتح کی قیادت میں لڑی گئی جنگ ’صواري الفتح‘ سے لیا گیا ہے۔‘‘ یہ حوالہ بحری ہتھیاروں کے اس مرکز کی طرف ہے جو شمالی غزہ میں جنگجوؤں کی تیاری اور تربیت کے لیے استعمال ہوتا تھا۔
یہ بھی پڑھیں : اسرائیل سے منسلک گروہ غزہ میں منشیات پھیلانے کی کوشش کر رہے ہیں، مزاحمتی سکیورٹی
ویڈیو میں القسام کی بحری فورس کے جنگجوؤں کی جانب سے غزہ کے سمندر میں ربڑ کی کشتیوں کا استعمال کرتے ہوئے کیے گئے تربیتی مشقوں کے مناظر دکھائے گئے، جس میں قابض اسرائیل کی بحری تنصیبات اور اہداف پر حملوں کی نقل کی گئی، جبکہ تربیت کے دوران متعدد اہداف کو دھماکوں سے تباہ بھی کیا گیا۔
ویڈیو میں القسام کے جنگجوؤں کی سمندر کی گہرائیوں میں غوطہ خوری اور شدید فائرنگ کے درمیان ساحل پر پہنچنے کی تربیت کو بھی دستاویزی شکل دی گئی، جس نے ان یونٹس کی صلاحیتوں کو ظاہر کیا جنہیں بعد میں ’ہیومن فراگز‘ (انسانی مینڈک) کے نام سے جانا گیا۔
ویڈیو میں القسام بریگیڈز کے ان متعدد کمانڈروں کو بھی دکھایا گیا جو سنہ 2023ء میں غزہ کی پٹی پر جنگ کے آغاز کے بعد سے شہید ہوئے، جن میں شمالی غزہ بریگیڈ کے کمانڈر ابو انس الغندور، ابو صہیب البیاری، ابو العبد صیام، ابو صہیب الحداد اور شہید حذیفہ الکحلوت (ابو عبیدہ) شامل تھے۔
بریگیڈز نے اپنی بحری افواج کی جانب سے انجام دیے گئے آپریشنز کے کچھ پہلوؤں کا بھی تذکرہ کیا، اور نشاندہی کی کہ بحری فورس دو بار زیکیم کے ساحل میں دراندازی کرنے میں کامیاب رہی۔ پہلی بار سنہ 2014ء میں غزہ کی پٹی پر جنگ کے دوران، جس کے مناظر میں القسام کے ارکان کو ساحل پر پہنچ کر اسرائیلی فوج کے ساتھ جھڑپ کرتے ہوئے دکھایا گیا۔
دوسرا آپریشن، جسے القسام نے سب سے کامیاب قرار دیا، وہ سات اکتوبر سنہ 2023ء کی صبح کا تھا، جب القسام کے جنگجوؤں کا ایک گروپ زیکیم نیول بیس تک پہنچنے اور اسرائیلی فوج کے ساتھ لڑائی کرنے میں کامیاب ہوا، جس میں کئی فوجیوں کی ہلاکت اور زخمی ہونے کی تصدیق کی گئی۔
The post القسام نے طوفان الاقصیٰ سے قبل اپنی بحری افواج کی تربیت کی نقاب کشائی کر دی appeared first on شیعہ نیوز پاکستان.
