شیعہ نیوز: عراق میں امریکی اور سعودی افواج کی کارروائیوں کے بعد عراقی وزیراعظم کے دفتر نے کہا ہے کہ عراقی سرزمین سے کسی بھی قسم کی فوجی کارروائی یا حملوں سے متعلق فیصلہ کرنے کا اختیار صرف عراقی حکومت کے پاس ہے۔
رپورٹ کے مطابق وزیراعظم علی فالح الزیدی کے دفتر سے جاری بیان کے مطابق عراقی سیکیورٹی کونسل نے امریکی اور سعودی حملوں کے معاملے پر ضروری سفارتی اقدامات کے لیے وزارتِ خارجہ کو ہدایات جاری کر دی ہیں۔
بیان میں تمام متعلقہ فریقوں پر زور دیا گیا ہے کہ وہ کشیدگی میں اضافے سے گریز کریں اور ایسے اقدامات سے اجتناب کریں جو خطے کی صورت حال کو مزید پیچیدہ بنا سکتے ہیں۔
یہ بھی پڑھیں : یمن کا باب المندب سے ٹول وصول کرنے پر غور
عراقی حکومت نے واضح کیا کہ وہ عراق کو علاقائی تنازعات سے دور رکھنے کی پالیسی پر کاربند ہے اور ملکی خودمختاری، سلامتی اور استحکام کے تحفظ کے لیے سفارتی اور قانونی ذرائع اختیار کیے جائیں گے۔
دوسری جانب عراقی ملیشیا کا دعویٰ ہے کہ امریکی اور سعودی افواج نے مبینہ ایرانی حمایت یافتہ مراکز کو نشانہ بنایا، جس میں 20 افراد شہید اور 32 زخمی ہوئے، ملیشیا کے مطابق حملے ان کے ہیڈکوارٹرز پر کیے گئے، جبکہ سب سے بڑا حملہ صوبہ نینوا میں ہوا جہاں 10 افراد شہید ہو گئے۔
سعودی وزارتِ دفاع کے مطابق یہ کارروائی سعودی تیل تنصیبات پر ڈرون حملوں کے جواب میں امریکی سینٹرل کمانڈ کے ساتھ مل کر کی گئی۔
ادھر امریکی فوج کا کہنا ہے کہ حملے ایران سے وابستہ مسلح گروہوں کے خلاف کیے گئے، جن پر امریکی افواج اور سعودی توانائی کے بنیادی ڈھانچے پر حملوں کی تیاری کا الزام تھا۔
The post حملوں کے خلاف کارروائی کا اختیار صرف حکومت کے پاس ہے، عراقی وزیراعظم appeared first on شیعہ نیوز پاکستان.
