دبئی: قانونی چارہ جوئی مزید آسان، وکلا کیلئے نیا ڈیجیٹل پلیٹ فارم لانچ

شیعہ نیوز: دبئی میں قانونی کارروائیوں کو مزید آسان بنانے کےلیے دبئی پولیس نے وکلا کے لیے ایک نیا ڈیجیٹل پلیٹ فارم متعارف کروایا ہے۔

اس نئے پلیٹ فارم کے ذریعے وکلا اب پولیس اسٹیشن جائے بغیر اپنے کیسز کی پیروی کر سکیں گے۔

نئے پلیٹ فارم کے ذریعے وکلا اور دیگر قانونی ماہرین کو آن لائن قانونی خدمات فراہم کی جائیں گی۔ ان خدمات میں فوجداری شکایات کی تحقیقات، سفری پابندیوں کی جانچ پڑتال، اور قیدیوں سے ورچوئل ملاقات کی اجازت نامہ حاصل کرنا شامل ہیں۔

یہ بھی پڑھیں : گرین لینڈ تنازع: امریکی وزیرِ خزانہ نے تجارتی جنگ کے خدشات کو ’ہسٹیریا‘ قرار دیدیا

نئے ڈیجیٹل پلیٹ فارم کے ذریعے پاور آف اٹارنی کا حصول بھی فوری طور پر ممکن ہو گا، جو وکلا اور ان کے کلائنٹس کے لیے ایک بڑی سہولت ہے۔

نئے پلیٹ فارم پر وکلا کو الیکٹرانک دستخط اور سرٹیفکیٹس کا حصول بھی چند کلکس کی دوری پر ہوگا جس سے قانونی کارروائیاں تیز اور مزید شفاف ہوں گی۔

نئے پلیٹ فارم کے ذریعے اماراتی شناختی اسمارٹ ڈیجیٹل ایپ ’یو اے ای پاس‘ کے ذریعے قانونی خدمات حاصل کی جا سکیں گی۔ اس کے علاوہ آرٹیفیشل انٹیلجنس اسسٹنٹ (AiX) وکلا کو مرحلہ وار رہنمائی فراہم کرے گا تاکہ وہ پلیٹ فارم کا بھرپور فائدہ اٹھا سکیں۔

The post دبئی: قانونی چارہ جوئی مزید آسان، وکلا کیلئے نیا ڈیجیٹل پلیٹ فارم لانچ appeared first on شیعہ نیوز پاکستان.

​