شیعہ نیوز: آج دنیا بھر میں شیعہ مسلمان بارہویں امام، حضرت امام مہدی ابن حسن العسکریؑ کی ولادت باسعادت کا جشن عقیدت و احترام کے ساتھ منا رہے ہیں۔
اس موقع پر ایران، عراق، پاکستان، بھارت، خلیجی ممالک اور یورپ سمیت دنیا کے مختلف حصوں میں خصوصی محافل میلاد، دعائیہ اجتماعات اور عبادات کا اہتمام کیا گیا۔
اس سلسلے کی سب سے بڑی اور مرکزی تقریبات ایران میں مسجد جمکران جبکہ عراق میں مقامِ امام زمانہؑ کربلا میں منعقد ہو رہی ہیں، جہاں لاکھوں زائرین کی آمد متوقع ہے۔
مسجد جمکران کو امام مہدیؑ سے منسوب خصوصی حیثیت حاصل ہے، جہاں شبِ نیمہ شعبان کو خصوصی عبادات، دعائے کمیل، دعائے ندبہ اور عریضہ نویسی کا اہتمام کیا جاتا ہے۔
یہ بھی پڑھیں : ندیم رضا سرور کی آواز انسٹیٹیوٹ آف میڈیا اینڈ منجمینٹ سائنسسز آمد، نثار سید نے شیلڈ سے نوازا
شیعہ مومنین نے شب 15 شعبان کو عبادت میں بسر کیا، نوافل ادا کیے، قرآن خوانی کی اور امام مہدیؑ کی بارگاہ میں عریضے تحریر کیے۔ مختلف شہروں میں میلاد کی محافل سجائی گئیں، مساجد و امام بارگاہوں کو چراغاں سے آراستہ کیا گیا جبکہ مٹھائی اور نیاز بھی تقسیم کی گئی۔
علماء کرام کا کہنا ہے کہ امام مہدیؑ کا تصورِ ظہور عدل، انصاف اور ظلم کے خاتمے کی علامت ہے، اور نیمہ شعبان کا دن امید، صبر اور اصلاحِ نفس کا پیغام دیتا ہے۔
امام مہدیؑ کا تعارف اور ولادت کا سال
حضرت امام مہدی ابن حسن العسکریؑ کی ولادت 15 شعبان المعظم 255 ہجری کو سامرہ (موجودہ عراق) میں ہوئی۔ آپ اہل تشیع کے عقیدے کے مطابق بارہویں امام اور آخری حجتِ خدا ہیں، جو اللہ کے حکم سے غیبت میں ہیں اور مقررہ وقت پر ظہور فرما کر دنیا کو عدل و انصاف سے بھر دیں گے۔
The post دنیا بھر میں امام مہدیؑ کی ولادت باسعادت کا جشن، جمکران اور کربلا میں مرکزی تقریبات appeared first on شیعہ نیوز پاکستان.
