شیعہ نیوز: جمعیت علماء پاکستان سندھ کے صدر علامہ سید عقیل انجم قادری نے کہا ہے کہ اسرائیل ایک دہشتگرد ریاست ہے اور اسکا جوہری پروگرام امن عالم کیلئے سنگین خطرہ ہے، ان خیالات کا اظہار انہوں نے دورہ سندھ کے موقع پر جے یو پی حیدرآباد کے ذمہ داران سے ملاقات کے دوران کیا۔ اس موقع پر صوبائی سیکرٹری اطلاعات عبدالروف الوانی، ضلع حیدرآباد کے صدر قاری غلام سرور امینی، جنرل سیکرٹری رضوان شیخ اور دیگر عہدیدار بھی موجود تھے۔
علامہ عقیل انجم قادری نے حکومتِ پاکستان سے مطالبہ کیا کہ وہ عالمی سطح پر مطالبہ کرے کہ اسرائیل کے ایٹمی پروگرام کو پابند کیا جائے اور اس کو جوہری عدم پھیلاؤ کے معاہدے (NPT) میں شامل ہونے اور اپنی تمام جوہری سہولیات کو بین الاقوامی جوہری توانائی ایجنسی (IAEA) کے مکمل معائنے کیلئے کھولنے پر مجبور کیا جائے۔
علامہ عقیل انجم قادری نے کہا کہ اسرائیل کے پاس بڑی تعداد میں جوہری وار ہیڈز موجود ہیں اور اس نے این پی ٹی پر دستخط بھی نہیں کیے ہیں، اسرائیل کے پاس جوہری ہتھیاروں کی موجودگی خطے میں امن و استحکام کیلئے ایک سنگین خطرہ ہے۔
یہ بھی پڑھیں : یہودی آبادکاروں کا مسجدِ اقصیٰ کے احاطے میں دھاوا بولنا، پرچم لہرانا قابل مذمت ہے، پاکستان
علامہ عقیل انجم قادری نے کہا کہ دہشتگرد اسرائیل کا مکروہ چہرہ دنیا پر واضح ہو چکا ہے، اسرائیل نے ابتک لاکھوں انسانوں عورتوں، بچوں، حتی کہ اسپتال میں داخل مریضوں، اسکول کے طلبہ، ڈاکٹروں اور صحافیوں کا قتل عام کیا ہے۔
انہوں نے کہا کہ اسرائیلی وزیراعظم نتن یاہو کا جنگی جنون اور اسکے جوہری ہتھیار عالمی امن کیلئے شدید خطرہ ہیں، اسرائیلی طرز عمل دنیا کو تیسری عالمی جنگ کی جانب دھکیل رہا ہے، لہٰذا اقوام متحدہ خاص طور پر مسلم ممالک کو اسرائیلی ایٹمی قوت کو لگام دینے کیلئے مشترکہ مؤقف اختیار کرنا چاہیے۔
The post دہشتگرد ریاست اسرائیل کا جوہری پروگرام امن عالم کیلئے سنگین خطرہ ہے، علامہ عقیل انجم قادری appeared first on شیعہ نیوز پاکستان.
