شیعہ نیوز: مقبوضہ مغربی کنارے کے وسط میں رام اللہ شہر کے مغرب میں واقع “حلمیش” نامی بستی کے قریب یہودی آباد کاروں کے ایک گروپ کو نشانہ بنانے والے فائرنگ کے واقعے میں اتوار کی صبح ایک اسرائیلی یہودی آباد کار ہلاک اور کئی دوسرے زخمی ہو گئے، جبکہ قابض اسرائیلی فوج نے حملہ آور کی تلاش کے لیے بڑے پیمانے پر سرچ آپریشن شروع کر دیا ہے۔
عبرانی میڈیا نے اطلاع دی ہے کہ بستی کے قریب ہونے والی فائرنگ کے نتیجے میں تیس کی دہائی کا ایک یہودی آباد کار اپنی شدید زخموں کی تاب نہ لاتے ہوئے ہلاک ہو گیا، جبکہ دیگر افراد بھی زخمی ہوئے۔
میدانی ذرائع کے مطابق، حملہ آور نے رام اللہ کے شمال مغرب میں واقع گاؤں دیر نظام کے قریب عین وادی ریا کے علاقے میں یہودی آباد کاروں کے ایک گروپ کو گولیوں کا نشانہ بنایا، اور موقع سے فرار ہونے میں کامیاب ہو گیا۔
یہ بھی پڑھیں : شکست کے بعد ٹرمپ نے ایک بار پھر میڈیا کو نشانہ بنا لیا، نیویارک ٹائمز
واقعے کے بعد قابض فوج نے علاقے میں فوجی نفری روانہ کر دی، اور فائرنگ کرنے والے تک پہنچنے کی کوشش میں جائے وقوعہ کے گردونواح اور اس کی طرف جانے والے راستوں پر بڑے پیمانے پر تلاشی اور سرچ آپریشن شروع کر دیا۔
قابض فوج نے واقعے کے اردگرد کے کئی دیوں اور قصبوں کا سخت سیکیورٹی گھیرائو کر لیا اور شہریوں کی نقل و حرکت کے راستوں کو بند کرنے کے ساتھ ساتھ فوجی ناکے بھی لگا دیے، جبکہ علاقے میں فوج کی بھاری تعیناتی کی گئی۔
یہ اقدامات مغربی کنارے میں بڑھتی ہوئی کشیدگی کے ماحول میں سامنے آئے ہیں، جہاں مختلف علاقے مسلسل فوجی دھاووں اور یہودی آباد کاروں کے حملوں کا سامنا کر رہے ہیں۔
فائرنگ کا یہ واقعہ مغربی کنارے اور مقبوضہ بیت المقدس کے مختلف حصوں میں یہودی تہواروں کے سیزن اور قابض افواج کی طرف سے عائد کردہ سخت فوجی اقدامات کے ساتھ ساتھ یہودی آباد کاروں کے حملوں میں اضافے کے دوران پیش آیا۔
مقبوضہ بیت المقدس کے شہر میں، اتوار کی صبح یہودی آباد کاروں نے قابض پولیس اور خصوصی دستوں کے تحفظ میں مسجد اقصیٰ مبارک کے صحنوں پر دھاوا بولا، اور نام نہاد یہودی “یوم غفران” (یومِ کفارہ) کے موقع پر اس کے صحنوں میں تلمودی رسومات اور دعائیں ادا کیں۔
القدس گورنری نے بتایا کہ صبح کے اوقات سے تقریباً 100 یہودی آباد کاروں نے مسجد پر دھاوا بولا، جبکہ سینکڑوں دیگر افراد باب المغاربة کے قریب دھاوا بولنے کی تیاری کے لیے جمع ہو رہے تھے، جس سے آنے والے گھنٹوں میں تعداد میں اضافے کا قوی امکان ہے۔
The post رام اللہ میں فائرنگ سے ایک یہودی آباد کار ہلاک اور کئی زخمی appeared first on شیعہ نیوز پاکستان.
