شیعہ نیوز: مجلس وحدت مسلمین پاکستان کے وائس چیئرمین علامہ احمد اقبال رضوی نے لاہور سے مجلس وحدت مسلمین کے مقامی رہنما رانا کاظم کی گزشتہ 8 روز سے مبینہ گمشدگی پر شدید تشویش کا اظہار کرتے ہوئے کہا ہے کہ رانا کاظم کو مبینہ طور پر نقاب پوش اہلکار رات کی تاریکی میں اپنے ساتھ لے گئے، تاہم تاحال ان کے بارے میں کوئی معلومات سامنے نہیں آئیں۔
علامہ احمد اقبال رضوی نے کہا کہ رانا کاظم کے اہلِ خانہ شدید اضطراب اور پریشانی کا شکار ہیں۔ متعلقہ اداروں سے رابطوں اور قانونی طریقۂ کار اختیار کرنے کے باوجود تاحال کسی ادارے نے ان کی گرفتاری کی ذمہ داری قبول نہیں کی۔ نہ ہی یہ بتایا جا رہا ہے کہ انہیں کس الزام کے تحت حراست میں لیا گیا ہے اور وہ اس وقت کس حال میں ہیں۔
یہ بھی پڑھیں : مجموعہ کتب احتساب ناصبیت کے کاری وار جاری، تکفیری وکلاء کتاب اورمولانا اللہ وسایا کے خلاف میدان میں اتر آئے
انہوں نے کہا کہ کسی شہری کو قانونی تقاضے پورے کیے بغیر لاپتہ رکھنا آئین اور قانون کے بنیادی اصولوں کے منافی ہے۔ رانا کاظم ایک محبِ وطن پاکستانی ہیں اور، ہمارے علم کے مطابق، ان کے خلاف کسی غیر قانونی سرگرمی میں ملوث ہونے یا کسی ایف آئی آر کا کوئی معلوم ریکارڈ موجود نہیں۔
علامہ احمد اقبال رضوی نے مطالبہ کیا کہ رانا کاظم کو فوری طور پر بازیاب کیا جائے، ان کے اہلِ خانہ کو ان کی خیریت اور موجودہ مقام کے بارے میں آگاہ کیا جائے اور اگر ان کے خلاف کوئی قانونی الزام ہے تو انہیں آئین و قانون کے مطابق متعلقہ عدالت میں پیش کیا جائے۔ مجلس وحدت مسلمین پاکستان کسی بھی شہری کو غیر معینہ مدت تک لاپتہ رکھنے کے عمل کی مذمت کرتی ہے اور رانا کاظم کی فوری بازیابی کا مطالبہ کرتی ہے۔
The post رانا کاظم گزشتہ 8 روز سے لاپتہ، کسی ادارے نے اب تک گرفتاری کی تصدیق نہیں کی: علامہ احمد اقبال رضوی appeared first on شیعہ نیوز پاکستان.
