شیعہ نیوز: غزہ کی پٹی میں مزاحمت کے قریبی ذرائع سمجھے جانے والے سکیورٹی پلیٹ فارم “المجد” نے جمعرات کے روز فلسطینی شہریوں کو صہیونی ریاست کے انٹیلی جنس اداروں کے ان ہتھکنڈوں سے خبردار کیا ہے جو متعدد بہانوں اور نت نئے طریقوں سے رابطوں کے لیے استعمال کیے جا رہے ہیں۔
ویب سائٹ نے ذکر کیا ہے کہ حالیہ عرصے میں مزاحمت کے سکیورٹی اداروں کو شہریوں کی جانب سے ایسی متعدد شکایات اور سکیورٹی اشارے موصول ہوئے ہیں جن میں ان سے براہِ راست اور بالواسطہ رابطوں کی کوششیں کی گئی ہیں، جن کا مقصد خالصتاً انٹیلی جنس معلومات کا حصول اور سکیورٹی مقاصد ہیں۔
ویب سائٹ کے مطابق، ان ہتھکنڈوں میں فون کالز، ایس ایم ایس (SMS) اور سوشل میڈیا پلیٹ فارمز کے ذریعے رابطے شامل ہیں، اس کے علاوہ انسانی ضروریات کا استحصال کرتے ہوئے امدادی اور طبی اداروں کے ناموں کا لبادہ بھی اوڑھا جاتا ہے۔
یہ بھی پڑھیں : ایران امریکی غنڈہ گردی کے سامنے سر تسلیم خم نہیں کرے گا، سابق پاکستانی سفیر
رپورٹ میں یہ بھی بتایا گیا ہے کہ غاصب اسرائیل نے کاغذی اشتہارات اور ایسے سرکلرز کا سہارا لینا بھی شروع کیا ہے جن میں اپنے افسران سے رابطے کے نمبر درج ہوتے ہیں، مزید برآں سوشل میڈیا پر فرضی اکاؤنٹس بنا کر شہریوں کو ورغلانے اور جال میں پھنسانے کی کوششیں کی جا رہی ہیں۔
سکیورٹی پلیٹ فارم نے شہریوں سے اپیل کی ہے کہ وہ انتہائی احتیاط اور بیداری کا مظاہرہ کریں اور کسی بھی مشتبہ رابطے کا جواب نہ دیں، ساتھ ہی اس بات پر زور دیا کہ اس طرح کی کسی بھی کوشش کا سامنا ہونے پر فوری طور پر متعلقہ سکیورٹی حکام کو مطلع کیا جائے۔
اعلامیے میں اس بات پر بھی زور دیا گیا کہ غاصب اسرائیل کے انٹیلی جنس اداروں کے ذرائع اور ہتھکنڈے ہر روز بدلتے اور متنوع ہوتے جا رہے ہیں، جس کے لیے دائمی بیداری اور کسی بھی غیر مصدقہ رابطے کے پیچھے نہ لگنا وقت کی اہم ضرورت ہے۔
The post غزہ: شہریوں سے اسرائیل کے انٹیلی جنس رابطوں کے ہتھکنڈوں پر سکیورٹی انتباہ appeared first on شیعہ نیوز پاکستان.
