شیعہ نیوز: غزہ کی پٹی کے مختلف علاقوں میں پناہ گزینوں کے خیموں اور نشانہ بننے والے مقامات پر قابض صہیونی فوج کی مسلط کردہ فائرنگ اور توپ خانے کی بمباری کے نتیجے میں ایک بچے اور ایک خاتون سمیت پانچ فلسطینی شہید اور دیگر کئی زخمی ہو گئے۔
شہری دفاع کے عملے نے جبالیہ پر سابقہ اسرائیلی بمباری میں شہید ہونے والے فؤاد أبو قمر کی لاش نکال لی۔
جنوبی غزہ پٹی میں خان یونس شہر کے وسط میں واقع سکہ کے قریب قابض اسرائیل کے ایک مسلّح ڈرون کے حملے کے نتیجے میں موسیٰ أبو معروف نامی فلسطینی شہید ہو گیا۔
مقامی ذرائع نے اطلاع دی ہے کہ شمالی غزہ کی پٹی میں کواڈ کاپٹر ڈرون کی فائرنگ سے زخمی ہونے والا نوجوان محسن أحمد مصطفى بهجہ زخموں کی تاب نہ لاتے ہوئے شہید ہو گیا۔
یہ بھی پڑھیں : افغانستان، جوابی بمباری، 28 خوارج ہلاک، خودکش بمباروں کے تربیتی مرکز سمیت 3 اہداف کو تباہ کردیا گیا
اسی طرح جنوبی پٹی میں مواصی رفح کے علاقے میں قابض صہیونی فوج کی طرف سے شہریوں پر چلائی جانے والی گولی سینے میں لگنے سے بچہ اسماعیل البردويل شہید ہو گیا۔
دریں اثنا وسطی غزہ میں نصيرات کیمپ کے مشرق میں صلاح الدین روڈ پر آج صبح قابض صہیونی فوج کی گولیوں سے شدید زخمی ہونے والی فداء خضر طوطح زخموں کی تاب نہ لاتے ہوئے شہادت نوش کر گئیں۔
غزہ شہر کے مغرب میں واقع الشاطی کیمپ پر قابض صہیونی فوج کی گن بوٹس کی فائرنگ کے نتیجے میں تین شہری زخمی ہو گئے۔
خان یونس کے شمال میں سٹی حمد اور اس کے گردونواح میں قابض صہیونی فوج کی گاڑیوں کی فائرنگ سے تین شہری زخمی ہو گئے، جبکہ خان یونس کے مغرب میں حی الأمل کے علاقے میں واقع الأخرس میں پناہ گزینوں کے خیموں کو نشانہ بنانے والی توپ خانے کی بمباری کے نتیجے میں دو دیگر افراد زخمی ہو گئے۔
وسطی غزہ میں برید اور مغازی کیمپوں کے درمیان صلاح الدین روڈ پر پھیلے ہوئے پناہ گزینوں کے خیموں پر قابض صہیونی فوج کی گاڑیوں کی فائرنگ سے ایک خاتون اور ایک بچہ زخمی ہو گیا۔
مزید برآں، البریج کیمپ کے مشرق میں واقع بلاک 12 میں ابو الروس خاندان کے گھر پر اسرائیلی توپ خانے کا گولہ گرنے سے لگنے والی آگ کے نتیجے میں دو شہری زخمی ہو گئے۔
البریج کیمپ کے مشرقی علاقوں میں اسرائیلی توپ خانے کی بمباری جاری رہی، جبکہ خان یونس کے مشرقی اور جنوبی علاقوں کو بھی توپ خانے کی گولہ باری کا نشانہ بنایا گیا، اور اسی کے ساتھ پناہ گزینوں کے خیموں پر اندھا دھند فائرنگ بھی کی گئی۔
رفح کے شمال میں واقع علاقہ الشاکوش میں قابض ٹینکوں نے خان یونس کی مواصی میں واقع علاقے فش فرش میں پناہ گزینوں کے خیموں پر شدید فائرنگ کی۔
اس کے علاوہ جنوبی پٹی کی فضائی حدود میں اسرائیلی مسلّح ڈرون نیچی پروازیں کرتے رہے۔
غزہ شہر کے شمالی علاقوں میں توپ خانے سے گولہ باری کی گئی، جبکہ فضا میں مسلّح ڈرون طیاروں کی مکثف پروازیں بھی جاری رہیں۔
نہایت مشکل انسانی حالات کے سائے میں غزہ پٹی کے مختلف علاقوں پر قابض اسرائیل کی جارحانہ کارروائیاں، شہریوں اور بے گھر افراد کے خیموں پر توپ خانے سے حملے اور فائرنگ کا سلسلہ ہنوز جاری ہے۔
The post غزہ میں صہیونی فوج کی بمباری اور فائرنگ سے پانچ فلسطینی شہید ،متعدد زخمی appeared first on شیعہ نیوز پاکستان.
