شیعہ نیوز: ایرانی وزیر خارجہ عباس عراقچی نے کہا ہے کہ مفاہمتی یادداشت پر حتمی دستخط کے بعد ایران کے جوہری پروگرام اور امریکی پابندیوں کے خاتمے سمیت اہم امور پر 60 روزہ مذاکرات کا پہلا دور فوری طور پر شروع کیا جائے گا۔
رپورٹ کے مطابق ایرانی وزیر خارجہ عباس عراقچی نے کہا ہے کہ ایران اور امریکہ کے درمیان مفاہمتی یادداشت پر دستخط کے فورا بعد مذاکرات کا پہلا دور شروع ہوگا۔
عباس عراقچی نے پارلیمنٹ کی اقتصادی کمیٹی کے ارکان سے ملاقات کے بعد بتایا کہ امکان ہے کہ جمعہ کو سوئٹزرلینڈ میں دونوں ممالک کے وفود کے سربراہان کی ملاقات ہوگی، جہاں مفاہمتی یادداشت پر دستخط کیے جائیں گے، جس کے بعد باضابطہ مذاکرات کا آغاز ہوجائے گا۔
یہ بھی پڑھیں : ایران امریکہ کے ساتھ معاہدے کے ذریعے حتمی کامیابی کی جانب ایک بڑا قدم بڑھا چکا ہے، قالیباف
انہوں نے کہا کہ ورچوئل طور پر طے پانے والی اس مفاہمتی یادداشت سے ایران کو معاشی فوائد حاصل ہوں گے، تاہم ملک اپنی تمام ضروریات کے لیے ان فوائد پر انحصار نہیں کرے گا۔
ایرانی وزیر خارجہ کے مطابق، مذاکرات کے دوران امریکی پابندیوں کے خاتمے اور ایران کے جوہری پروگرام سمیت اہم امور پر 60 روز کے اندر بات چیت کی جائے گی، جبکہ ضرورت پڑنے پر اس مدت میں توسیع بھی کی جاسکتی ہے۔
عباس عراقچی نے خبردار کیا کہ ایران امریکہ کے ساتھ مذاکرات میں بداعتمادی اور احتیاط کا رویہ اختیار کرے گا کیونکہ ماضی میں واشنگٹن متعدد بار وعدہ خلافی اور معاہدوں سے انحراف کرچکا ہے۔
انہوں نے مزید بتایا کہ اتوار کی شب طے پانے والی مفاہمتی یادداشت میں دونوں ممالک کے لیے مختلف ذمہ داریاں مقرر کی گئی ہیں، جن میں سے بعض پر پیر سے عمل درآمد شروع ہو جائے گا جبکہ باقی نکات پر جمعہ کو حتمی دستخط کے بعد عمل کیا جائے گا۔
The post مفاہمتی یادداشت پر دستخط کے فورا بعد ایران اور امریکہ کے درمیان مذاکرات کا آغاز ہوگا، عراقچی appeared first on شیعہ نیوز پاکستان.
