شیعہ نیوز: شہر بھر میں جماعتِ اسلامی کے احتجاج اور ریلیوں کے باعث سڑکوں کی بندش متوقع، شہریوں کو ٹریفک مسائل کا سامنا ہوگا، مگر سوال یہ ہے کہ جب مسئلہ مہنگائی کا ہو تو سب خاموش اور جب معاملہ عزاداریِ امام حسینؑ کا ہو تو اعتراضات کیوں شروع ہوجاتے ہیں؟
شہر میں آج جماعتِ اسلامی کی جانب سے مہنگائی کے خلاف احتجاج اور ریلیوں کا اعلان کیا گیا ہے، جس کے باعث مختلف شاہراہوں پر ٹریفک کی روانی متاثر ہونے اور بعض مقامات پر سڑکوں کی بندش کا امکان ہے۔ بڑی تعداد میں شہریوں کے ٹریفک میں پھنسنے کا خدشہ بھی ظاہر کیا جا رہا ہے۔
مہنگائی ایک ایسا مسئلہ ہے جس سے ملک کا ہر طبقہ متاثر ہے، اسی لیے احتجاج اور عوامی اجتماعات کے باعث شہریوں کو درپیش عارضی مشکلات کو بہت سے لوگ وسیع تر عوامی مسئلے کے تناظر میں برداشت کرتے ہیں۔
یہ بھی پڑھیں : سیکیورٹی فورسز کی خیبرپختونخوا میں کارروائیاں، 10 خوارج ہلاک
لیکن سوال یہ ہے کہ یہی اصول جلوسِ عزا کے معاملے میں کیوں تبدیل ہوجاتا ہے؟
کربلا کے شہید، نواسۂ رسول حضرت امام حسینؑ کی یاد میں نکالے جانے والے جلوسِ عزا کے موقع پر ٹریفک کی روانی متاثر ہو تو بعض حلقوں کی جانب سے شدید اعتراضات سامنے آتے ہیں، حالانکہ عزاداری کے جلوس بھی ایک مذہبی و آئینی حق کے تحت منعقد ہوتے ہیں۔
عزاداروں کا کہنا ہے کہ اگر جلوس کا دورانیہ تقریباً 6 سے 7 گھنٹے ہے تو بعض اوقات انتظامی اقدامات کے باعث سڑکیں 14 سے 15 گھنٹے تک بند رہتی ہیں۔ سوال یہ ہے کہ اگر حکومت بہتر ٹریفک مینجمنٹ، متبادل راستوں اور مؤثر سیکیورٹی پلان کے ذریعے مسئلہ حل کرسکتی ہے تو شہریوں اور عزاداروں کو غیر ضروری مشکلات میں کیوں ڈالا جاتا ہے؟
سیکیورٹی کے نام پر پورے جلوس کو کنٹینرز میں بند کرنے کے بجائے حکومت کو اصل خطرے سے نمٹنا چاہیے۔ اگر چند گنے چنے دہشت گرد یا شرپسند عناصر خطرہ ہیں تو ان کے خلاف کارروائی کی جائے، نہ کہ پوری مذہبی سرگرمی کو ایسی پابندیوں میں جکڑ دیا جائے جس سے عزاداروں کے ساتھ ساتھ عام شہری بھی پریشان ہوں۔
مہنگائی کے خلاف احتجاج ہو یا امام حسینؑ کی عزاداری کا جلوس، شہریوں کی مشکلات کم کرنا حکومت کی ذمہ داری ہے۔ اصل سوال احتجاج یا جلوس کا نہیں بلکہ انتظامی صلاحیت، مساوی رویے اور بہتر ٹریفک مینجمنٹ کا ہے۔
عوام کا سوال واضح ہے: اگر احتجاج کے دوران سڑکوں کی بندش برداشت کی جاسکتی ہے تو عزاداری کے جلوس کے لیے بہتر انتظامات کیوں نہیں کیے جاسکتے؟
The post مہنگائی/ سیاسی لیڈر کی رہائی کے لئے احتجاج پر خاموشی، جلوسِ عزا پر ٹریفک کا شور کیوں؟ appeared first on شیعہ نیوز پاکستان.
