شیعہ نیوز: رہبر انقلاب شہید امام سید علی خامنہ ایؒ و دیگر شہداء کی عظمت اور قربانیوں کو خراجِ تحسین پیش کرنے کے لیے اتحادِ اُمت فورم کے زیرِ اہتمام کوئٹہ، پاکستان میں ایک عظیم الشان تکریم شہداء کانفرنس کا انعقاد کیا گیا، جس میں کوئٹہ شہر سمیت ملک بھر سے تعلق رکھنے والی سیاسی، سماجی اور دینی شخصیات، علمائے کرام، خواتین و حضرات اور مختلف شعبہ ہائے زندگی سے وابستہ افراد نے بھرپور شرکت کی۔
کانفرنس سے علامہ محمد امین شہیدی، سید ناصر عباس شیرازی، محمد تقی، علامہ محمد کاظم بہجتی، علامہ غلام حسین وجدانی، علامہ مقصود علی ڈومکی، علامہ سید ہاشم موسوی، علامہ رحمت علی رضوانی، علامہ شیخ ولایت حسین جعفری اور بردار محسن علی سمیت دیگر مقررین نے خطاب کیا۔ مقررین نے اپنے خطابات میں شہداء کی عظیم قربانیوں کو خراجِ عقیدت پیش کیا اور امتِ مسلمہ کے اتحاد، بیداری اور مقاومت کے پیغام کو اجاگر کیا۔
تلاوتِ کلامِ پاک کی سعادت قاری سید شاکر حسین نے حاصل کی، جبکہ بردار اشرف علی اخلاقی اور محمد بلال نے نعت اور ترانہ پیش کر کے شرکاء کے قلوب کو منور فرمایا۔ کانفرنس میں کراچی سے تشریف لائے معروف نوحہ خواں و منقبت خواں بردار احمد رضا ناصری نے ترانۂ شہادت پیش کر کے محفل کو مزید پُرسوز بنا دیا۔
کانفرنس کے دوران شہدائے کوئٹہ، شہدائے افغانستان، شہدائے ایران اور شہدائے غزہ و فلسطین کو شاندار خراجِ تحسین پیش کیا گیا۔ اس موقع پر مختلف نمائش گاہیں اور خصوصی اسٹالز بھی قائم کیے گئے، جن میں شہداء کی جدوجہد، قربانیوں اور مقاومت کی تاریخ کو اجاگر کیا گیا۔
اللہ تعالیٰ تمام شہداء کے درجات بلند فرمائے اور ہمیں اُن کے راستے پر ثابت قدم رہنے کی توفیق عطا فرمائے۔ آمین۔
The post کوئٹہ، شہید آیت اللہ خامنہ ای و دیگر شہداء کی یاد میں تکریم شہداء کانفرنس کا فقید المثال انعقاد appeared first on شیعہ نیوز پاکستان.
