شیعہ نیوز: متحدہ عرب امارات سے جبری طور پر بےدخل کیے جانے والے پاکستانیوں اور اوورسیز پاکستانیوں کو درپیش مسائل کے حوالے سے اوورسیز کمیٹی کے ارکان نے اپوزیشن لیڈر سینیٹ اور مجلس وحدت مسلمین پاکستان کے چیئرمین علامہ راجہ ناصر عباس جعفری اور رکن قومی اسمبلی انجینئر حمید حسین طوری کے ہمراہ اہم ملاقاتوں کا سلسلہ جاری رکھا۔
اس سلسلے میں وفد نے وفاقی وزیر دفاع خواجہ محمد آصف، وفاقی وزیر برائے پارلیمانی امور طارق فضل چوہدری اور پاکستان تحریک انصاف کے مرکزی رہنما و رکن قومی اسمبلی علی محمد خان سے ملاقات کی۔ ملاقاتوں میں متحدہ عرب امارات سے پاکستانی شہریوں کی جبری بےدخلی، پاسپورٹس کی بلاکنگ، ویزا پابندیوں اور اوورسیز پاکستانیوں کو درپیش دیگر سنگین مسائل پر تفصیلی تبادلۂ خیال کیا گیا۔
اس سے قبل اوورسیز کمیٹی کے ارکان نے اپوزیشن لیڈر سینیٹ کے چیمبر میں علامہ راجہ ناصر عباس جعفری سے ملاقات کی اور انہیں اوورسیز پاکستانیوں کے مسائل، خدشات اور مطالبات سے آگاہ کیا۔ بعد ازاں وفد نے پارلیمنٹ لاجز میں رکن قومی اسمبلی انجینئر حمید حسین طوری کے دفتر میں ملاقات کرکے اوورسیز پاکستانیوں کے مسائل کے حل کے لیے مؤثر حکمتِ عملی اور آئندہ کے لائحہ عمل پر تفصیلی مشاورت کی۔
یہ بھی پڑھیں : ابھی تک حکومت کا حصہ بننے کا کوئی حتمی فیصلہ نہیں ہوا، ممبر جی بی اسمبلی کاظم میثم
وفد نے مطالبہ کیا کہ متحدہ عرب امارات میں مقیم پاکستانیوں کے مسائل کو فوری طور پر سفارتی سطح پر اٹھایا جائے، بلاک شدہ پاسپورٹس کی بحالی اور متاثرہ افراد کو درپیش مشکلات کے ازالے کے لیے عملی اقدامات کیے جائیں۔ ملاقات کرنے والی شخصیات نے اوورسیز پاکستانیوں کے مسائل کے حل کے لیے ہر ممکن تعاون اور متعلقہ فورمز پر بھرپور آواز اٹھانے کی یقین دہانی کرائی۔
وفد نے اس امید کا اظہار کیا کہ حکومت اور متعلقہ ادارے اوورسیز پاکستانیوں کے جائز مسائل کے حل کے لیے فوری اور مؤثر اقدامات کریں گے تاکہ بیرون ملک مقیم پاکستانیوں کا اعتماد بحال ہو اور انہیں درپیش مشکلات کا مستقل حل ممکن بنایا جا سکے۔
The post متحدہ عرب امارات سے جبری طور پر بےدخل پاکستانیوں کے وفدکی قائد حزب اختلاف سینیٹ علامہ راجہ ناصرعباس اور ایم این اے حمید حسین سے ملاقات appeared first on شیعہ نیوز پاکستان.
