شیعہ نیوز: مجلس وحدت مسلمین پاکستان کے ایم این اے انجینئر حمید حسین طوری نے آج اسلام آباد میں وفاقی وزیر خزانہ محمد اورنگزیب سے ان کے دفتر میں اہم ملاقات کی۔ ملاقات میں آئندہ مالی سال کے بجٹ اور خصوصاً ضم شدہ قبائلی اضلاع (سابق فاٹا) میں انکم ٹیکس سمیت نئے ٹیکسوں کے نفاذ کے حوالے سے تفصیلی تبادلۂ خیال کیا گیا۔
اس موقع پر انجینئر حمید حسین طوری نے وفاقی وزیر خزانہ کو آگاہ کیا کہ ضم شدہ قبائلی اضلاع کے عوام گزشتہ کئی دہائیوں سے بدامنی، دہشت گردی اور مختلف سیکیورٹی آپریشنز کے باعث شدید معاشی مشکلات کا شکار رہے ہیں۔
ان حالات کے نتیجے میں مقامی معیشت، کاروباری سرگرمیاں اور روزگار کے مواقع بری طرح متاثر ہوئے ہیں، جس کی وجہ سے وہاں کے عوام اس وقت کسی بھی نئے ٹیکس کے بوجھ کو برداشت کرنے کی پوزیشن میں نہیں ہیں۔
انہوں نے زور دیتے ہوئے کہا کہ قبائلی اضلاع کی پائیدار ترقی اور معاشی بحالی کے لیے ضروری ہے کہ ان علاقوں کو خصوصی مراعات اور ریلیف فراہم کیا جائے، نہ کہ ان پر مزید مالی بوجھ ڈالا جائے۔
یہ بھی پڑھیں : سربراہ ایم ڈبلیوایم وقائد حزب اختلاف علامہ راجہ ناصرعباس سے وزیر داخلہ محسن نقوی وطلال چوہدری کی ملاقات
وفاقی وزیر خزانہ محمد اورنگزیب نے انجینئر حمید حسین طوری کے تحفظات کو غور سے سنا اور یقین دہانی کرائی کہ ضم شدہ قبائلی اضلاع کے عوام کے مسائل اور مشکلات کو مدنظر رکھا جائے گا اور مذکورہ ٹیکسوں کو قبائلی اضلاع میں نافذ نہیں کیا جائے گا۔
ملاقات میں پاکستان تحریک انصاف خیبرپختونخوا کے صدر و رکن قومی اسمبلی جنید اکبر، سابق اسپیکر قومی اسمبلی اسد قیصر، انجینئر امیر مقام اور رانا ثناء اللہ بھی موجود تھے۔
انجینئر حمید حسین طوری نے اس امید کا اظہار کیا کہ وفاقی حکومت قبائلی اضلاع کے عوام کی معاشی مشکلات کے حل، روزگار کے مواقع کی فراہمی اور ترقیاتی منصوبوں کی تکمیل کے لیے عملی اقدامات اٹھائے گی تاکہ علاقے میں پائیدار ترقی اور خوشحالی کا خواب شرمندۂ تعبیر ہو سکے۔
The post قومی اسمبلی میں ایم ڈبلیوایم کے پارلیمانی لیڈرانجینئر حمید حسین کی وفاقی وزیر خزانہ محمد اورنگزیب سے ملاقات appeared first on شیعہ نیوز پاکستان.
