شیعہ نیوز: مجلس وحدت مسلمین کراچی ڈویژن اور وحدت یوتھ کے زیر اہتمام بریٹو روڈ، سولجر بازار میں شہید آیت اللہ سید علی خامنہ ای کی یاد میں تعزیتی مجلس اور موجودہ رہبر معظم سید مجتبیٰ خامنہ ای سے تجدیدِ عہد کیلئے اجتماع کا انعقاد کیا گیا۔ تقریب میں شرکاء کو آیت اللہ سید علی خامنہ ای کی زندگی اور خدمات پر مبنی ایک دستاویزی فلم (ڈاکومنٹری) دکھائی گئی۔ تقریب میں علماء کرام، دینی و سماجی شخصیات، مجلس وحدت مسلمین کے رہنما، کارکنان اور شہریوں کی بڑی تعداد شریک ہوئی۔
مجلس عزا سے خطاب کرتے ہوئے مجلس وحدت مسلمین سندھ کے سیکریٹری جنرل علامہ مختار احمد امامی نے کہا کہ آیت اللہ سید علی خامنہ ای کی زندگی امتِ مسلمہ کیلئے استقامت، دینی بصیرت اور خدمت کا ایک اہم باب سمجھی جاتی ہے۔ انہوں نے کہا کہ ایسے اجتماعات کا مقصد شخصیات کی خدمات کو یاد کرنا، اتحادِ امت کو فروغ دینا اور اہلِ بیتؑ کی تعلیمات سے وابستگی کو تازہ کرنا ہے۔ اپنے خطاب کے اختتام پر انہوں نے فضائل و مصائبِ آلِ محمدؐ بیان کرتے ہوئے شرکاء کو صبر، استقامت اور دینی اقدار پر عمل کی تلقین کی۔
یہ بھی پڑھیں : شہید رہبر کے قاتلین سے قصاص یقینی ہے، آیت اللہ نوری ہمدانی
علامہ صادق جعفری نے اپنے خطاب میں کہا کہ امتِ مسلمہ کو موجودہ عالمی حالات میں باہمی اتحاد، فکری ہم آہنگی اور دینی شعور کی ضرورت ہے۔ انہوں نے کہا کہ اختلافات کے باوجود امت کے اجتماعی مفادات کو مقدم رکھنا وقت کی اہم ضرورت ہے۔ علامہ ملک غلام عباس نے خطاب کرتے ہوئے کہا کہ علماء اور دینی مراکز کی ذمہ داری ہے کہ وہ نوجوان نسل کی فکری و اخلاقی تربیت پر خصوصی توجہ دیں۔ انہوں نے دینی تعلیمات، وحدتِ امت اور معاشرتی ہم آہنگی کے فروغ پر زور دیا۔
ایم ڈبلیو ایم کراچی کے صدر کاظم عباس نے اپنے خطاب میں کہا کہ نوجوانوں کو مثبت کردار، سماجی خدمت اور دینی اقدار کے فروغ میں فعال کردار ادا کرنا چاہیے۔ انہوں نے کہا کہ ملت کے اتحاد اور باہمی تعاون کے ذریعے ہی درپیش چیلنجز کا مقابلہ کیا جا سکتا ہے۔ صائم جعفری اور دیگر مقررین نے بھی اپنے خیالات کا اظہار کرتے ہوئے حاضرین سے مذہبی و سماجی ذمہ داریوں کی ادائیگی، اتحاد، صبر اور استقامت کی تلقین کی۔ تقریب کے اختتام پر شہدائے راہ مقاومت اور امتِ مسلمہ کے اتحاد، امن، استحکام اور عالمِ اسلام کی سربلندی کیلئے خصوصی دعا کرائی گئی۔
The post ایم ڈبلیوایم کراچی کے تحت رہبر شہید آیت اللہ خامنہ ایؒ کو خراج تحسین اور رہبر معظم آیت اللہ مجتبیٰ خامنہ ای سے تجدید عہد کیلئے اجتماع کا انعقاد appeared first on شیعہ نیوز پاکستان.
