شیعہ نیوز: اطلاعات کے مطابق عالمی سطح پر لڑکوں کا نام ’’محمد‘‘ رکھنے کے رجحان میں اضافہ ہوا ہے اور برطانیہ اس سلسلے میں مسلسل تیسرے سال سرِ فہرست ہے۔
رپورٹ کے مطابق برطانیہ میں مسلسل تیسرے سال نومولود لڑکوں کا سب سے مقبول نام ’’محمد‘‘ قرار پانے کے بعد مغربی ممالک میں اس نام کی مقبولیت ایک بار پھر توجہ کا مرکز بن گئی ہے۔
انگلینڈ اور ویلز کے علاوہ جرمنی، بیلجیم، فرانس، نیدرلینڈز، سوئیڈن اور امریکہ میں ’’محمد‘‘ نام رکھنے کے رجحان میں اضافہ ہوا ہے۔
رپورٹ میں یہ بھی بتایا گیا ہے کہ بعض یورپی ممالک میں اسلام مخالف سیاست کے عروج کے باوجود کئی بڑے شہروں میں ’’محمد‘‘ بدستور مقبول ترین ناموں میں شامل ہے۔
یہ بھی پڑھیں : یورپ میں صرف جون کے آخری ہفتے میں شدید گرمی سے 10 ہزار سے زیادہ افراد کی موت
انگلینڈ اور ویلز میں نومولود لڑکوں کے ناموں کے تازہ ترین سرکاری اعداد و شمار نے ایک بار پھر اس رجحان کی تصدیق کر دی ہے کہ ’’محمد‘‘ مسلسل تیسرے سال بھی سب سے زیادہ رکھا جانے والا لڑکوں کا نام بن گیا ہے۔
برطانیہ کے سرکاری ادارے آفس فار نیشنل اسٹیٹسٹکس (او این ایس) کی تازہ رپورٹ کے مطابق 2025 کے دوران ’’محمد‘‘ پہلے نمبر پر رہا، جبکہ ’’نوآ‘‘ (نوح) دوسرے اور ’’اولیور‘‘ تیسرے نمبر پر رہے۔
دلچسپ بات یہ ہے کہ اگرچہ یورپ کے کئی ممالک میں دائیں بازو کی جماعتیں تارکین وطن اور مسلمانوں کے خلاف سخت موقف اختیار کیے ہوئے ہیں لیکن دوسری جانب مسلم خاندانوں میں ’’محمد‘‘ نام کی مقبولیت مسلسل بڑھ رہی ہے۔
یہی وجہ ہے کہ اب سوال صرف برطانیہ تک محدود نہیں رہا بلکہ یہ جاننے کی کوشش بھی کی جا رہی ہے کہ جرمنی، فرانس، بیلجیم، نیدرلینڈز، سوئیڈن اور دیگر غیر مسلم اکثریتی ممالک میں یہ نام کس مقام پر ہے اور وہاں اس کی مقبولیت کس رفتار سے بڑھ رہی ہے۔
اس پیش رفت نے نہ صرف برطانیہ بلکہ پورے یورپ میں آبادیاتی تبدیلیوں، مسلم آبادی کے بڑھتے ہوئے تناسب اور سماجی رجحانات پر نئی بحث چھیڑ دی ہے۔
The post عالمی سطح پر ’’محمد‘‘ نام رکھنے کے رجحان میں اضافہ، برطانیہ مسلسل تیسرے سال سرِ فہرست appeared first on شیعہ نیوز پاکستان.
