شیعہ نیوز: جنوبی لبنان کے علاقے کفررمان میں اسرائیلی فوج کی طرف سے کیے جانے والے ایک ہولناک قتل عام کے نتیجے میں دو شیرخوار بچوں سمیت نو شہری شہید اور پانچ دیگر زخمی ہو گئے۔ یہ حملہ ایک رہائشی عمارت کو نشانہ بناتے ہوئے کیا گیا جس کے نتیجے میں وہ مکمل طور پر تباہ ہو گئی۔ اسی بلدہ میں ہونے والے ایک اور فضائی حملے میں دو ریسکیو اہلکار بھی شہید ہو گئے۔
رپورٹ کے مطابق اسرائیلی جنگی طیاروں نے نصف شب کفررمان میں شیوعیہ گول چکر کے گردونواح میں دانی فرحات نامی شہری کی تین منزلہ رہائشی عمارت پر بمباری کی جس کے نتیجے میں عمارت تباہ ہو گئی اور متعدد جانی نقصان ہوا۔
یہ بھی پڑھیں : غزہ میں ایک بچی سمیت دو فلسطینی شہید، متعدد زخمی، جنگ بندی کی خلاف ورزیاں جاری
فوری طور پر طبی اداروں کے امدادی دستے جائے وقوعہ پر پہنچے اور وہ دو شیرخوار بچوں سمیت نو شہداء کی لاشیں نکالنے میں کامیاب ہو گئے جبکہ پانچ زخمیوں کو بھی بچا لیا گیا۔
ایک اور جارحانہ کارروائی میں اسرائیل کے ایک ڈرون نے کفررمان میں ایک سویلین کار کو نشانہ بنایا جس کے نتیجے میں اسلامی رسالہ اسکاؤٹس کے دو طبی امدادی کارکن علی شحرور اور ہادی فرحات شہید ہو گئے جو اسی گاڑی میں سوار تھے۔
اسی دوران قابض اسرائیل کے جنگی طیاروں نے النبطیہ الفوقا اور بلدہ عربصاليم سمیت جنوب لبنان کے مختلف علاقوں اور قصبات پر فضائی حملوں کا سلسلہ شروع کیا جہاں ایک حملے میں موسیٰ شرارہ کا گھر تباہ ہو گیا۔
اسرائیلی فورسز نے رات کے وقت بلدہ دیر الزہرانی میں ایک عمارت کو خالی کرنے کی تنبیہ جاری کی تھی جس کے تقریباً بائیس منٹ کے بعد قابض اسرائیل کے جنگی طیاروں نے اسے نشانہ بنایا اور تباہ کر دیا۔
The post جنوبی لبنان پر اسرائیلی فضائی حملوں میں دو شیرخوار بچوں سمیت گیارہ افراد شہید، پانچ زخمی appeared first on شیعہ نیوز پاکستان.
