شیعہ نیوز: مجلس وحدت مسلمین کراچی ڈویژن کے صدر حافظ کاظم عباس کا کہنا ہے کہ پیٹرولیم مصنوعات کی قیمتوں میں مسلسل اضافہ عوام پر معاشی حملہ ہے، عوام کو مہنگائی اور ٹیکسوں کے بوجھ تلے ریلیف سے محروم جبکہ اشرافیہ اور بااثر طبقات کو اربوں روپے کی مراعات و چھوٹ دی جا رہی ہے، وفاقی حکومت لیوی سمیت ظالمانہ ٹیکسز کا فوری خاتمہ کرے، حکمران ہوش کے ناخن لیں ورنہ عوامی سیلاب انہیں بہا لے جائیگا۔
ان خیالات کا اظہار انہوں نے وفاقی حکومت کی جانب سے پیٹرولیم مصنوعات کی قیمتوں میں مسلسل اضافے پر اپنے ردعمل اور ضلعی شوریٰ اجلاس ملیر و کورنگی میں عہدیداران سے خطاب کرتے ہوئے کیا۔ ضلعی شوریٰ اجلاس میں حافظ کاظم عباس نے تنظیمی امور کا جائزہ لیتے ہوئےآئندہ کے لائحۂ عمل پر تفصیلی گفتگو کی۔
حافظ کاظم عباس نے کہا کہ پٹرولیم مصنوعات کی قیمتوں میں مسلسل اضافہ مہنگائی سے پریشان عوام پر ایک اور معاشی حملہ ہے، حکومت پیٹرولیم مصنوعات کی قیمتوں میں اضافہ فوری طور پر فیصلہ واپس لے۔
انہوں نے کہا کہ شہباز حکومت پیٹرولیم مصنوعات کی قیمتوں میں مسلسل اضافہ کرکے عوام پر مسلسل معاشی بمباری کر رہی ہے، آئی ایم ایف کی ایماء پر پٹرولیم مصنوعات کی قیمتوں میں مسلسل اضافہ عوامی معاشی قتل ہے۔
یہ بھی پڑھیں: افغان طلبہ کا تعلیمی مستقبل متاثر کرنے والا PMDC نوٹیفکیشن فوری واپس لیا جائے، پٹرولیم لیوی میں اضافہ بھی مسترد
انہوں نے کہا کہ پیٹرول، ڈیزل اور بجلی مہنگی کرکے عوام کو زندہ در گور کیا جا رہا ہے، وفاقی حکومت عوام کو حقیقی اور بامعنیٰ معاشی ریلیف فراہم کرنے میں یکسر ناکام ہو چکی ہے اور عالمی مالیاتی اداروں کی غلامی کرتے ہوئے عوام دشمن پالیسیاں نافذ کر رہی ہے۔
انہوں نے کہا کہ جعلی مینڈیٹ کے ذریعے مسلط کی گئی عوام دشمن حکومت نے پہلے ہی مہنگائی، بے روزگاری اور معاشی بدحالی کے ذریعے عوام کی زندگی اجیرن بنا دی ہے۔
حافظ کاظم عباس نے وفاقی حکومت مطالبہ کیا کہ پیٹرولیم مصنوعات کی قیمتوں میں فوری کمی، لیوی سمیت ظالمانہ ٹیکسز کا خاتمہ اور عوام کو حقیقی ریلیف دیا جائے، عوام کے صبر کا پیمانہ لبریز ہو چکا ہے، حکمرانوں نے ہوش کے ناخن نہ لئے تو عوامی سیلاب انکے آمرانہ اقتدار کو بہا لے جائیگا۔
حافظ کاظم عباس نے کہا کہ مجلس وحدت مسلمین عوام کے حقوق کی بازیابی کیلئے اپنی آواز بلند کرتی رہے گی، اس حوالے سیاسی، مذہبی و سماجی حلقوں سے ملاقاتوں کا سلسلہ جاری ہے، جلد محبت وطن قوتوں کے ساتھ مل کر عوام کو حقوق دلوانے کیلئے مشترکہ لائحہ عمل کا اعلان کریں گے۔
The post عوام بنیادی سہولیات سے محروم جبکہ اشرافیہ کو اربوں کی مراعات حاصل ہیں، حافظ کاظم عباس appeared first on شیعہ نیوز پاکستان.
