شیعہ نیوز: بلوچستان کے ضلع مستونگ کے علاقے کنک وادی میں سکیورٹی فورسز اور مسلح افراد کے درمیان فائرنگ کے تبادلے کے نتیجے میں فتنہ الہندوستان کے9 مسلح دہشت گردہلاک ہو گئے ہیں، جبکہ ایک سکیورٹی اہلکار کے زخمی ہونے کی اطلاع ہے۔
سکیورٹی ذرائع کے مطابق یہ واقعہ اس وقت پیش آیا جب مسلح افراد کے ایک گروہ نے کنک وادی میں واقع سکیورٹی چوکی پر حملے کی کوشش کی۔ فورسز کی جانب سے کی گئی جوابی کارروائی کے دوران ابتدائی طور پر 2 حملہ آور ہلاک ہوئے، جبکہ دیگر موقع سے فرار ہونے میں کامیاب ہو گئے۔ سکیورٹی اہلکاروں نے فرار ہونے والے افراد کا تعاقب کیا اور تعاقب کے دوران مزید 7 مسلح افراد کو ہلاک کر دیا گیا۔
یہ بھی پڑھیں : حزب اللہ لبنان کے شہید قائدین سید حسن نصراللہ اور سید ہاشم صفی الدین کی دوسری برسی پر مرکزی تقریب کا اعلان
ذرائع نے بتایا کہ فائرنگ کے تبادلے میں زخمی ہونے والے سکیورٹی اہلکار کو فوری طور پر طبی امداد کے لئے نزدیک ترین ہسپتال منتقل کر دیا گیا ہے۔ انتظامیہ کے مطابق ہلاک شدگان کے قبضے سے 3 موٹر سائیکلیں، اسلحہ اور گولہ بارود برآمد کیا گیا ہے، اور علاقے میں سکیورٹی سخت کرکے مزید تحقیقات جاری ہیں۔
دوسری جانب وفاقی وزیر داخلہ محسن نقوی اور وزیراعلیٰ بلوچستان سرفراز بگٹی نے مستونگ کارروائی پر الگ الگ بیانات جاری کئے ہیں۔ وزیر داخلہ اور وزیراعلیٰ نے اسے سکیورٹی فورسز کے لئے ایک اہم کارروائی قرار دیتے ہوئے علاقے میں امن و امان کے قیام اور سکیورٹی اقدامات کو مزید فعال بنانے کے عزم کا اعادہ کیا، جبکہ وزیراعلیٰ بلوچستان نے زخمی اہلکار کی جلد صحت یابی کے لئے نیک خواہشات کا اظہار بھی کیا۔
The post مستونگ، سکیورٹی فورسز کی کارروائی،فتنہ الہندوستان کے 9 دہشتگرد ہلاک appeared first on شیعہ نیوز پاکستان.
