شیعہ نیوز: سپاہ پاسداران انقلاب اسلامی کے کمانڈر انچیف جنرل وحیدی نے کہا ہے کہ تاریخ کے اس اہم موڑ پر اپنا کردار ادا کرنے کا وقت آگیا ہے۔
سپاہ پاسداران انقلاب اسلامی کے کمانڈر انچیف نے جمعے کے روز “پیشگامان رہائی” (آزادی کے پیشرو) نامی کانفرنس کی اختتامی تقریب سے خطاب کرتے ہوئے موجودہ دور کی جدوجہد کی نوعیت کی طرف اشارہ کیا اور کہا کہ حق و باطل کی جنگ کا میدان آج پہلے سے کہیں زیادہ دنیا بھر کے لوگوں کے سامنے ہے۔
انھوں نے اس بات پر زور دیتے ہوئے کہ ایرانی قوم تاریخ کے ایک حساس مرحلے سے گزر رہی ہے اور عالمی سامراج کے ساتھ برسر پیکار ہے، کہا کہ آج ایرانی معاشرہ اور قوم ایک عظیم اور مقدس جہاد میں مصروف ہیں اور جس طرح رہبر شہید نے وعدہ کیا تھا، اسلامی انقلاب کے مجاہدین تھکنے کا نام نہیں لیں گے اور تاریخ کے اس اہم موڑ پر اپنا کردار ادا کرنے کے لیے آمادہ رہتے ہوئے اپنے سامنے موجود چوٹیوں کو سر کریں گے۔
یہ بھی پڑھیں : صہیونی جرائم پر ایرانی وزیر خارجہ عراقچی کا او آئی سی کا ہنگامی اجلاس بلانے کا مطالبہ
سپاہ پاسداران انقلاب اسلامی کے کمانڈر انچیف نے کہا کہ دشمن بہت سے وسائل اور بے شمار سازوسامان لے کر آیا تھا اور اس کے پاس بہت زیادہ وسائل تھے۔ ایران کے خلاف استعمال ہونے والے گولہ بارود کی اتنی بڑی مقدار کم ہی دیکھنے میں آتی ہے تاہم اسے توقع نہیں تھی کہ معاملات اس طرح آگے بڑھیں گے۔
انھوں نے کہا کہ اتنا سارا گولہ بارود، اتنے سارے طیارے اور اتنے سارے طیارہ بردار بحری جہاز کہاں گئے؟ ان کا کیا ہوا؟ وہ کہاں پہنچے؟ حق کامیاب ہوا اور باطل تاریخ کے کوڑے دان میں جا گرا۔
جنرل وحیدی نے کہا کہ جنگ کے میدان میں جو کچھ ہم دیکھ رہے ہیں، وہ صرف فوجی شکست نہیں ہے بلکہ دشمن کو نظریاتی اور سیاسی شکست کا بھی سامنا کرنا پڑا ہے۔ انھوں نے کہا کہ دنیا اب ان قاتلوں اور مجرموں کے لیے محفوظ جگہ نہیں رہے گی جنھوں نے ایران میں جرائم کا ارتکاب کیا ہے۔
آئی آر جی سی کے کمانڈر انچیف نے کہا کہ وہ ہمارے جزائر اور ساحلی علاقوں پر قبضہ کرنا چاہتے تھے لیکن ایسا نہ کر سکے کیونکہ انھوں نے دیکھا کہ وہاں ان کا سامنا ایسے شیردل افراد سے ہوگا جن کے ہاتھوں موت، تباہی اور اسیری کے سوا انھیں کچھ حاصل نہیں ہوگا اس لیے وہ ڈر گئے اور وہاں آنے کی ہمت نہ کر سکے۔
جنرل وحیدی نے زور دے کر کہا کہ دشمن کو جان لینا چاہیے کہ ہمارے مومن مجاہدین اور غیرت مند قوم کے پنجوں سے بچ نکلنے کا راستہ ذلت کے سوا کچھ نہیں۔
The post دشمن اسلامی جمہوریہ کو تبدیل کرنا چاہتا تھا لیکن خود تبدیل ہو گیا، جنرل وحیدی appeared first on شیعہ نیوز پاکستان.


