شیعہ نیوز: عباس عراقچی نے غزہ میں جنگ بندی کے باوجود اسرائیلی زمینی حملوں، فلسطینیوں کی نسل کشی اور جبری بے دخلی کے پیش نظر اسلامی ممالک سے فوری اقدامات کرنے کی اپیل کی ہے۔
رپورٹ کے مطابق ایران کے وزیر خارجہ سید عباس عراقچی نے اسلامی ممالک پر زور دیا ہے کہ وہ فلسطینی عوام کے خلاف اسرائیلی جرائم روکنے کے لیے ضروری اقدامات کریں۔ انہوں نے غزہ میں جنگ بندی کے باوجود اسرائیلی فوج کے بڑے پیمانے پر زمینی حملوں کے تناظر میں اسلامی تعاون تنظیم کے وزرائے خارجہ کا ہنگامی اجلاس بلانے کا مطالبہ کیا ہے۔
یہ بھی پڑھیں : عراق کے علاقے جرف النصر میں مشترکہ کمانڈ اینڈ کنٹرول ہیڈکوارٹر قائم
عراقچی نے سماجی رابطے کی ویب سائٹ ایکس پر عربی زبان میں جاری اپنے پیغام میں کہا کہ غزہ میں مظلوم فلسطینی عوام کی نسل کشی کا سلسلہ جاری ہے، جس کے پیش نظر اسلامی تعاون تنظیم کے وزرائے خارجہ کا ہنگامی اجلاس طلب کیا جانا چاہیے۔
ان کا یہ مطالبہ ایسے وقت سامنے آیا ہے جب محصور غزہ کے وسطی علاقوں میں اسرائیلی فوج کے نئے زمینی حملے کے نتیجے میں ایک ہی دن کے دوران 6 ہزار سے زائد فلسطینی بے گھر ہو گئے۔
عراقچی نے غزہ میں جاری نسل کشی، جبری بے دخلی اور انسانی امداد کی فراہمی روکنے کو ’’انسانیت کے ضمیر پر ایک بدنما داغ‘‘ قرار دیتے ہوئے عالمی برادری سے مطالبہ کیا کہ وہ فوری اقدامات کرے، اسرائیلی محاصرہ ختم کرائے اور انسانی امداد کی فراہمی یقینی بنائے۔
درایں اثناء ایران کی وزارت خارجہ نے بھی ایک الگ بیان میں فلسطینیوں، بالخصوص غزہ کے عوام کے خلاف اسرائیلی جرائم کے تسلسل کی شدید مذمت کرتے ہوئے نسل کشی روکنے اور ذمہ داروں کو انصاف کے کٹہرے میں لانے کے لیے فوری اور مؤثر عالمی اقدامات کی ضرورت پر زور دیا ہے۔
The post صہیونی جرائم پر ایرانی وزیر خارجہ عراقچی کا او آئی سی کا ہنگامی اجلاس بلانے کا مطالبہ appeared first on شیعہ نیوز پاکستان.


