شیعہ نیوز: اسرائیلی فوج نے مشرقی لبنان کے علاقے بقاع الغربی میں مختلف مقامات کو فضائی حملوں کا نشانہ بنایا۔
لبنانی ذرائع نے بتایا کہ اسرائیل کے دو ڈرون طیاروں نے بقاع کے علاقے میں واقع سحمر اور مشغرا کی بلدات میں اہداف پر حملے کیے۔
ذرائع کے مطابق ڈرون طیاروں نے بلدہ سحمر میں دو عمارتوں کو نشانہ بنایا جن کی نوعیت تاحال واضح نہیں ہو سکی۔ حملوں کے بعد لبنانی فوج کی دو گشت ٹیمیں نقصانات کا جائزہ لینے کے لیے متاثرہ مقامات کی جانب روانہ ہوئیں۔
یہ بھی پڑھیں : جارحیت کی گئی تو فیصلہ کن جواب دیں گے، امیر سعید ایروانی
اس سے قبل اسرائیلی فوج نے مغربی بقاع کے علاقے سحمر میں دو رہائشی عمارتوں کو نشانہ بنانے کی دھمکی دی تھی۔
اسی تناظر میں اسرائیلی فوج نے مشرقی لبنان کے مغربی بقاع میں واقع بلدہ مشغرا میں حزب اللہ کے اہداف پر بمباری کے ارادے کا اعلان بھی کیا۔
یہ خطرناک جارحیت اسرائیل کی جانب سے حزب اللہ کے ساتھ طے پانے والے جنگ بندی معاہدے کی مسلسل اور کھلی خلاف ورزیوں کے سلسلے کی ایک کڑی ہے جو نافذ العمل ہو چکا ہے۔
ان حملوں کے ساتھ ساتھ اسرائیل اپنے جنگی اور ڈرون طیاروں کی جنوبی لبنان کی فضاؤں میں مسلسل پروازیں جاری رکھے ہوئے ہے جبکہ گذشتہ جنگ کے دوران قبضے میں لی جانے والی پانچ سرحدی پہاڑیوں پر اس کا ناجائز قبضہ بدستور برقرار ہے جو خطے کے امن کے لیے ایک مستقل خطرہ بنا ہوا ہے۔
The post جنگ بندی کی خلاف ورزیوں کے دوران اسرائیل کے مشرقی لبنان میں فضائی حملے appeared first on شیعہ نیوز پاکستان.
