شیعہ نیوز: قائد ملت جعفریہ پاکستان علامہ سید ساجد علی نقوی نے قافلہ حسینی کی 28 رجب المرجب کو مدینہ منورہ سے روانگی کی مناسبت سے اپنے پیغام میں کہا ہے کہ نواسۂ رسول حضرت امام حسینؑ کی جدوجہد کا پہلا مرحلہ اسلام کے آفاقی، عادلانہ اور انسان دوست نظام کی سربلندی کے لیے یزید کی غیر قانونی خلافت پر بیعت سے انکار تھا، جبکہ دوسرے مرحلے میں حق کی سربلندی کے لیے اپنے آباؤ اجداد کے وطن مدینہ منورہ کو چھوڑنا شامل تھا، جو ایک عظیم اور بے مثال قربانی ہے۔ انہوں نے کہا کہ 28 رجب 60 ہجری کی شب امام عالی مقامؑ نے اپنے خاندان کے اکثر افراد اور بعض انصار کے ہمراہ اپنے جد امجد رسول خدا ﷺ کو الوداع کہا اور مدینہ سے مکہ مکرمہ کی طرف روانہ ہوئے۔ جب یزید کی کھلم کھلا مخالفت اور ناسازگار ماحول کے باعث اپنے وطن کو خیرباد کہنے کا فیصلہ کیا تو امام حسینؑ نے مدینہ سے نکلتے وقت سورۃ القصص کی آیت 18 کی تلاوت فرمائی، اور ساتھ ہی یہ اعلان کیا کہ ’’میں اپنے نانا رسول خدا ﷺ کی امت کی اصلاح کی غرض سے نکلا ہوں، جو اس عظیم سفر کے مقصد کو مکمل طور پر واضح کرتا ہے۔
علامہ سید ساجد علی نقوی نے کہا کہ امام حسینؑ نے مدینہ سے مکہ، اور پھر مکہ سے حج کے احرام کو عمرے میں تبدیل کر کے کربلا کے سفر کے دوران مختلف مقامات پر اپنے قیام کے اغراض و مقاصد کو نہایت واضح انداز میں بیان فرمایا، جس سے دنیا کی تمام غلط فہمیاں دور ہو گئیں۔ موت جیسی اٹل حقیقت کے یقینی ہونے کے باوجود امام عالی مقامؑ اپنے موقف سے پیچھے ہٹنے کے لیے ہرگز تیار نہ ہوئے۔ انہوں نے مزید کہا کہ یہی وجہ ہے کہ حکمرانوں کی جانب سے پیش کی جانے والی ہر قسم کی مالی، دنیاوی، حکومتی اور ذاتی پیشکشوں کو امام حسینؑ نے ٹھکرا دیا اور صرف قرآن و سنت پر مبنی عادلانہ نظام کے نفاذ کو ترجیح دی۔ یہ طرزِ عمل آج بھی ہر دور کے انسان کے لیے واضح پیغام رکھتا ہے۔ قائد ملت جعفریہ پاکستان نے کہا کہ امام عالی مقامؑ کی بے مثال جدوجہد اور تحریک سے آج بھی پوری دنیا میں آزادی اور حریت کی تحریکیں استفادہ کر رہی ہیں۔ دنیا کے وہ تمام طبقات جو فرسودہ، غیر منصفانہ، ظالمانہ اور آمرانہ نظاموں کے خلاف جدوجہد کر رہے ہیں، ان کے لیے امام حسینؑ کی تحریک ایک روشن مینار اور زندہ مثال ہے۔
یہ بھی پڑھیں: کراچی گل پلازہ حادثہ حکومتی نااہلی کا واضح ثبوت ہے، علامہ شبیر میثمی
انہوں نے کہا کہ امام حسینؑ نے صرف کسی ایک طبقے کی فلاح کی بات نہیں کی بلکہ پوری انسانیت کی فلاح و صلاح کا پیغام دیا۔ بالخصوص محروم، مظلوم اور پسے ہوئے طبقات کے خلاف ہونے والی سازشوں کو بے نقاب کیا، حکمرانوں کی بے قاعدگیوں، بے اعتدالیوں، بدعنوانیوں، کرپشن، اقرباء پروری، وسائل کی غیر منصفانہ تقسیم اور شہریوں کے بنیادی حقوق کی پامالی کی واضح نشاندہی فرمائی۔ علامہ سید ساجد علی نقوی نے کہا کہ امام حسینؑ کا یہ کردار آج کے دور میں دنیا کے ہر معاشرے اور ہر انسان کے لیے قابلِ تقلید ہے، اور بلا تفریق مذہب و مسلک ہر فرد اس عظیم تحریک سے رہنمائی حاصل کر سکتا ہے
The post امام حسینؑ نے پوری انسانیت کی فلاح و صلاح کی بات کی، علامہ ساجد نقوی appeared first on شیعہ نیوز پاکستان.
