شیعہ نیوز: اسرائیلی فوج نے جمعہ کے روز غزہ کی پٹی میں جنگ بندی کی خلاف ورزیوں کا سلسلہ مسلسل 132 ویں دن بھی جاری رکھا۔ اس دوران غزہ کی پٹی کے مختلف علاقوں میں فضائی حملے، توپ خانے کی گولہ باری، فائرنگ اور مکانات کو دھماکوں سے اڑانے کی سفاکانہ کارروائیاں کی گئیں۔
غزہ کی پٹی میں وزارت صحت نے بتایا ہے کہ اسرائیل کی مسلسل جاری جارحیت کے نتیجے میں گذشتہ 24 گھنٹوں کے دوران 2 شہدا اور 4 زخمیوں کو ہسپتالوں میں منتقل کیا گیا ہے۔
وزارت نے اپنی رپورٹ میں ذکر کیا ہے کہ گیارہ اکتوبر سنہ 2025ء کو ہونے والی جنگ بندی کے بعد سے اب تک شہدا کی مجموعی تعداد 611 ہو چکی ہے اور زخمیوں کی کل تعداد 1,630 تک پہنچ گئی ہے جبکہ ملبے تلے سے نکالے گئے شہدا کی مجموعی تعداد 726 ہے۔
یہ بھی پڑھیں : ہرممکن طریقے سے ایران کے ساتھ معاہدہ کریں گے، ٹرمپ کا ایک بار پھر دعویٰ
مقامی ذرائع نے بتایا کہ اسرائیلی فوج نے وسطی غزہ میں واقع بریدج کیمپ کے مشرقی حصے میں رہائشی عمارتوں کو بارود سے اڑا دیا جبکہ دوسری جانب اسرائیل کی جنگی کشتیوں نے جنوبی غزہ کے شہر خان یونس کے سمندر میں شدید فائرنگ کی۔
علاوہ ازیں خان یونس کے مشرقی حصے میں قابض فوج کی بکتر بند گاڑیوں نے گولیاں برسائیں اور شہر غزہ کے مشرقی علاقوں میں اسرائیلی فوج کے طیاروں نے دو فضائی حملے کیے جس کے ساتھ ساتھ توپ خانے کی گولہ باری بھی کی گئی۔
سیز فائر کے معاہدے پر عملدرآمد کے آغاز سے لے کر اب تک اسرائیلی فوج اپنی متواتر خلاف ورزیوں کے نتیجے میں 638 فلسطینیوں کو شہید کر چکی ہے جن میں 197 بچے اور 84 خواتین شامل ہیں جبکہ 1630 دیگر فلسطینی زخمی ہوئے ہیں۔
سات اکتوبر 2023ء سے شروع ہونے والی نسل کشی کی اس جنگ میں قابض افواج اب تک 72 ہزار سے زائد شہریوں کو شہید اور تقریباً 1 لاکھ 72 ہزار کو زخمی کر چکی ہیں جبکہ 8 ہزار سے زائد شہری لاپتہ ہیں۔ اس کے ساتھ ساتھ 90 فیصد سویلین انفراسٹرکچر وسیع پیمانے پر تباہ ہو چکا ہے جس کی تعمیر نو کی لاگت کا تخمینہ اقوام متحدہ نے تقریباً 70 ارب ڈالر لگایا ہے۔
The post اسرائیلی فوج کی غزہ میں جنگ بندی کی سنگین خلاف ورزیاں جاری، 2 فلسطینی شہید، 4 زخمی appeared first on شیعہ نیوز پاکستان.
