شیعہ نیوز: حماس رہنما محمد درویش نے ایرانی وزیر خارجہ کو خط لکھ کر غزہ میں جنگ بندی معاہدے پر عملدرآمد کی تازہ صورتحال سے آگاہ کیا ہے۔
رپورٹ کے مطابق، حماس کی قیادت کونسل کے سربراہ، محمد درویش نے سیدعباس عراقچی کے نام ایک خط میں ماہ رمضان کی آمد پر مبارکباد پیش کرتے ہوئے اسلامی جمہوریہ ایران کے لیے نیک تمناؤں کا اظہار کیا اور غزہ میں جنگ بندی معاہدے کے نفاذ کی تازہ ترین صورتحال پر مفصل رپورٹ فراہم کی۔
محمد درویش نے اپنے خط میں اس بات پر زور دیا کہ حماس نے غزہ جنگ بندی معاہدے کی مکمل پاسداری کی ہے، تاہم اسرائیلی حکومت نے معاہدے کی کھلی اور سنگین خلاف ورزیاں کی ہیں۔ انہوں نے فلسطینی علاقوں پر روزانہ حملوں، بالخصوص خواتین اور بچوں سمیت فلسطینی شہریوں کے قتل کا سلسلہ جاری رکھنے، فلسطینیوں کی گرفتاریوں، غزہ میں انسانی امداد کی ترسیل پر سخت پابندیوں، رفح گزرگاہ کی سرگرمیوں میں رکاوٹ ڈالنے اور فلسطینی شہریوں کی آمد و رفت محدود کرنے جیسے اقدامات کی نشاندہی کی۔
یہ بھی پڑھیں : برازیل میں “ہم سب ایران ہیں” مہم، 100 میٹر طویل ایرانی پرچم لہرایا گیا
خط میں یہ بھی کہا گیا کہ اسرائیل غزہ کی بنیادی تنصیبات کی بحالی کے عمل میں رکاوٹ ڈال رہا ہے اور ضروری تعمیر نو کی اجازت نہیں دے رہا۔
خط کے آخری حصے میں حماس رہنما نے ثالث ممالک اور عالمی برادری پر زور دیا کہ وہ اسرائیل کو اس کے وعدوں کی پابندی پر مجبور کریں، جن میں فوری طور پر قتل و غارت گری اور فلسطینی عوام کے حقوق کی پامالی کا خاتمہ، انسانی امداد کی بلا رکاوٹ فراہمی، رفح گزرگاہ پر عائد پابندیوں کا خاتمہ، مسافروں کی آمد و رفت میں آسانی، ایندھن، آلات اور تعمیر نو کے لیے درکار مشینری کی اجازت، انسانی اصولوں کی پاسداری اور فلسطینی قیدیوں پر تشدد و بدسلوکی کا خاتمہ شامل ہے۔
The post حماس رہنما کی عراقچی کو خط، غزہ جنگ بندی پر تفصیلی رپورٹ پیش appeared first on شیعہ نیوز پاکستان.
