شیعہ نیوز: آیت اللہ سید علی خامنہ ای کی امریکی۔اسرائیلی حملے میں شہادت کی تصدیق کے بعد بھارت کے مختلف علاقوں میں اتوار کے روز احتجاجی مظاہرے دیکھنے میں آئے۔ اترپردیش، جموں و کشمیر، تلنگانہ، دہلی اور کرناٹک سمیت کئی ریاستوں میں سوگواروں نے سوگ، احتجاج اور یکجہتی کے پروگراموں کا اعلان کیا۔
اترپردیش کے دارالحکومت لکھنؤ میں شیعہ رہنماؤں نے تین روزہ سوگ کا اعلان کیا ہے۔ شیعہ عالم مولانا سید کلب جواد نے ایک ویڈیو بیان میں آیت اللہ سید علی خامنہ ای کی “شہادت” پر سوگ منانے کا اعلان کرتے ہوئے مسلم برادری اور انسانیت دوست طبقات سے اپیل کی کہ بطور احتجاج اپنی دکانیں اور کاروباری مراکز بند رکھیں۔
انہوں نے بتایا کہ رات 8 بجے چھوٹا امام باڑہ میں تعزیتی اجلاس منعقد ہوگا جس کے بعد شمع روشن کرنے کی تقریب (کینڈل لائٹ ویجل) بھی کی جائے گی۔ انہوں نے ملک بھر کی حریت پسندوں سے اپیل کی کہ وہ اپنی اپنی ریاستوں میں بھی تعزیتی اجتماعات منعقد کریں۔
یہ بھی پڑھیں : ہماری پوری توجہ اس ظالمانہ جنگ میں اپنے عوام کے دفاع پر ہے ایران
اعلان کے بعد درگاہ حضرت عباس روڈ کے تاجر بورڈ نے بطور احتجاج کاروبار بند رکھا۔ شیعہ پرسنل لاء بورڈ کے جنرل سیکریٹری مولانا یعسوب عباس نے بھی امریکہ اور اسرائیل کے خلاف سخت احتجاج کا اعلان کیا ہے۔
جموں و کشمیر کے دارالحکومت سرینگر سمیت وادی کے مختلف علاقوں میں اتوار کو مظاہرے دیکھنے میں آئے۔ خواتین اور بچوں سمیت سینکڑوں افراد سڑکوں پر نکل آئے اور امریکہ و اسرائیل کے خلاف نعرے بازی کی۔ شہر کے مرکزی علاقے لال چوک میں مظاہرین کی بڑی تعداد جمع ہوئی جبکہ کسی بھی ناخوشگوار واقعہ سے نمٹنے کے لیے پولیس کی بھاری نفری تعینات کی گئی۔
ادھر علیحدگی پسند رہنما میر واعظ عمر فاروق نے سید علی خامنہ ای کی شہادت کی مذمت کرتے ہوئے پیر کو مکمل ہڑتال کی اپیل کی ہے۔ انہوں نے اپنے بیان میں مسلم امہ سے اتحاد کی اپیل کرتے ہوئے پرامن احتجاج کی تاکید کی۔
ریاست کرناٹک کے بعض علاقوں میں بھی سوگ اور احتجاجی مظاہرے ہوئے۔ قصبہ علی پور میں شہری سیاہ لباس پہن کر سڑکوں پر نکل آئے اور تین روز تک دکانیں بند رکھنے کا اعلان کیا گیا۔ کرناٹک اردو اکیڈمی کے رکن ناطق علی پوری نے کہا کہ سید علی خامنہ ای کی شہادت نے مقامی لوگوں کو گہرے دکھ میں مبتلا کر دیا ہے۔
ان کے مطابق مقامی انجمن نے قرآن خوانی اور خصوصی دعاؤں کا اہتمام کیا ہے جبکہ جلوس نکالنے کا منصوبہ بھی بنایا جا رہا ہے، جو پولیس اجازت سے مشروط ہوگا۔ بنگلورو میں انجمن اسلامیہ کے صدر سید زمین رضا نے اسکری مسجد میں خاموش احتجاج کی منصوبہ بندی کی تصدیق کی ہے۔
انہوں نے کہا کہ احتجاج اسرائیلی کارروائی کی مذمت کے لیے ہوگا اور تمام قانونی تقاضے پورے کیے جائیں گے۔
The post آیت اللہ سید علی خامنہ ای کی شہادت پر بھارت کے مختلف شہروں میں احتجاج، لکھنؤ میں تین روزہ سوگ appeared first on شیعہ نیوز پاکستان.
