شیعہ نیوز: مجلس وحدت مسلمین گلگت بلتستان کے صوبائی صدر آغا سید علی رضوی نے گلگت بلتستان کے عوام سے اپیل کی ہے کہ وہ آئندہ انتخابات میں سوچ سمجھ کر میرٹ پر اہل، دیانتدار، باکردار، اعلی تعلیم یافتہ اور علاقے کے لوگوں کے دکھ درد میں شامل ہونے والے امیدواروں کو ووٹ دیں۔ آمدہ انتخابات بہت اہم ہیں، ووٹ قوم کی امانت ہے، اس کا استعمال سوچ سمجھ کر کرنا ہو گا۔ ایک بیان میں ان کا کہنا تھا کہ ہمارا دین بھی میرٹ پر فیصلے کی تاکید کرتا ہے، ہم اس وقت فیصلہ کن مرحلے میں داخل ہو گئے ہیں۔ نوجوان نسل نہایت سمجھداری کے ساتھ آگے بڑھے، آئندہ آنے والے انتخابات میں نوجوانوں کا کردار نہایت اہم ہو گا، امید ہے کہ نوجوان نسل پڑھے لکھے امیدواروں کا انتخاب کر کے امر ہو گی اور نئی نسل لیڈر کے چناؤ میں غلطی نہیں کرے گی۔ انہوں نے کہا کہ آنے والا وقت نہایت ہی اہم ہے، نت نئے چیلنجوں کے مقابلے کیلئے ہمیں اعلی قیادت کے انتخاب کو یقینی بنانا ہو گا، جب تک ہم پڑھی لکھی قیادت کا انتخاب نہیں کریں گے تب تک قوموں کی ترقی ممکن نہیں ہے۔
انہوں نے کہا کہ کاظم میثم اور دیگر پڑھے لکھے نوجوانوں کا انتخاب وقت کی اہم ترین ضرورت ہے۔ انہوں نے بساط کے مطابق چیلنجوں کے باوجود اسمبلی کے اندر اور باہر بہترین انداز میں قومی و ملی ترجمانی کی ہے، اب یہ ہماری اخلاقی ذمہ داری ہے کہ ہم آئندہ انتخابات میں بھی کاظم میثم جیسے نوجوانوں کو اسمبلی میں بھیجنے کیلئے اپنے ووٹ کا درست استعمال کریں۔ انہوں نے کہا کہ اسلام دشمن قوتوں کو دندان شکن شکست دینے کیلئے ہمیں اپنی صفوں میں اتحاد و اتفاق پیدا کرنے کی ضرورت ہے۔ مسلم امہ اس وقت اہم دوراہے پر کھڑی ہے۔ پاکستان اور ایران کے خلاف ہونے والی سازشوں کو ہم یکجا ہو کر ناکام بنا سکتے ہیں، ہم ایران اور پاکستان کی سالمیت پر کبھی آنچ آنے نہیں دیں گے دونوں برادر اسلامی ملک کے دفاع کیلئے ہم ہر وقت کمربستہ ہونگے۔ پاکستان کی طرف میلی آنکھ سے دیکھنے والوں کی آنکھیں نکالیں گے۔
The post ہم فیصلہ کن مرحلے میں داخل ہو گئے ہیں، ووٹ کا استعمال سوچ سمجھ کر کریں،صدرایم ڈبلیوایم جی بی سید علی رضوی appeared first on شیعہ نیوز پاکستان.
