شیعہ نیوز: بانی سربراہ ادارہ منہاج الحسینؑ و سربراہ تحریک حسینیہ پاکستان علامہ ڈاکٹر محمد حسین اکبر نے منہاج القرآن سیکرٹریٹ میں منعقدہ معرکہ حق بنیان المرصوص سیمینار سے خطاب کرتے ہوئے کہا کہ پاک افواج، عوام اور حکومت نے معرکہ حق میں جو کامیابی حاصل کی وہ قابل تحسین ہے، دشمن کے ارادے تباہ و برباد ہوئے، ایک طرف فتنہ الہندوستان دوسری طرف طالبان مل کر پاکستان میں نفرت و دہشت گردی کی آگ بھڑکا رہے ہیں۔ ڈاکٹر محمد حسین اکبر نے کہا کہ لکی مروت میں معصوم افراد کو شہید کیا گیا، فیلڈ مارشل عاصم منیر اور شہباز شریف نے جس طرح یکجہتی کا مظاہرہ کرکے عالمی سطح پر فوجی مہارت کا لوہا منوایا وہ عظیم قدم ہے۔ ڈاکٹر محمد حسین اکبر نے کہا کہ جو جنگ ایران پر یہودیوں اور امریکہ کی طرف سے مسلط کی گئی وہ قابل مذمت ہے، ایران کا جرم صرف فلسطین کی آزادی کیلئے جدوجہد میں مدد اور صہیونی مظالم کو بند کروانا تھا، فلسطین کے مظلوموں کیلئے دعاگو ہیں ان کی مدد جاری رکھیں گے۔
ڈاکٹر محمد حسین اکبر کا مزید کہنا تھا کہ نادان دوست امارات، بحرین اور قطر جو کھل کر پاکستان کیخلاف آواز بلند کر رہے ہیں، پہلے بھی معیشت و امن تباہ کرنے کیلئے بھارت کا ساتھ دیتے رہے ہیں، بحرین، امارات، قطر اسرائیل کا دوسرا گھر بن چکے ہیں ان پر نظر رکھنا ہوگی۔ ڈاکٹر محمد حسین اکبر نے کہا کہ متحدہ عرب امارات سے ان لوگوں کو نکالا گیا جن کے نام شہدائے کربلا اور اہلبیتؑ کے ناموں پر رکھے گئے، شیعہ سنی میں جھگڑے ختم ہوگئے، دشمن ناکام منصوبوں میں ذلیل ہو چکا ہے۔ انہوں نے کہا کہ ہمیں اپنی صفوں میں وحدت کو قائم رکھنا ہوگا، کچھ ناسور خاتم النبینﷺ اور صحابہ کرامؓ جیسی عظیم شخصیات کی گستاخی کرکے فتنہ و فساد برپا کرنا چاہتے ہیں، ان کا راستہ روکنا ہوگا۔ علامہ محمد حسین اکبر نے کہا کہ ہمارے لئے پڑوسی ملک ایران کے وسائل سے استفادہ کرنا ہوگا، ایران سے معاشی معاملات کو بہتر کرنا ہوگا تاکہ عوام کو مہنگائی جیسی دلدل سے باہر نکال جا سکے۔
The post بحرین، امارات، قطر اسرائیل کا دوسرا گھر بن چکے ہیں ان پر نظر رکھنا ہوگی،علامہ ڈاکٹر محمد حسین اکبر appeared first on شیعہ نیوز پاکستان.
