شیعہ نیوز: ماہ محرم الحرام کے دوران امن و امان کی صورتحال برقرار رکھنے اور عزاداروں کے جان و مال کے تحفظ کو یقینی بنانے کیلئے کراچی پولیس نے جامع اور مؤثر سیکیورٹی پلان کو حتمی شکل دے دی ہے۔ سیکیورٹی حکام کے مطابق مجالس اور جلوسوں کے دوران حساس مقامات پر خصوصی نگرانی کی جائے گی، جبکہ شہر بھر میں پولیس اور قانون نافذ کرنے والے اداروں کو ہائی الرٹ رہنے کی ہدایات جاری کر دی گئی ہیں۔ پولیس ذرائع کے مطابق محرم الحرام کے دوران منعقد ہونے والی مجالس اور جلوسوں کی سیکیورٹی کیلئے تین درجاتی حفاظتی نظام نافذ کیا جائے گا۔ مرکزی جلوسوں اور اہم مجالس کی نگرانی کیلئے ضلع جنوبی سمیت دیگر حساس علاقوں میں پولیس کی بھاری نفری تعینات کی جائے گی۔ حکام کے مطابق مرکزی مجالس اور جلوسوں کی سیکیورٹی پر 800 سے زائد پولیس اہلکار، درجنوں پولیس موبائلز اور 120 سے زائد رضاکار تعینات ہونگے، جبکہ اسپیشل برانچ کے اہلکار بھی فرائض انجام دینگے۔
جلوسوں کے راستوں اور اہم مقامات کی مسلسل نگرانی جدید سی سی ٹی وی کیمروں کے ذریعے کی جائے گی۔ سیکیورٹی پلان کے تحت محرم الحرام کے دوران لاؤڈ اسپیکر کے غیرقانونی استعمال اور اسلحے کی نمائش پر مکمل پابندی عائد ہوگی۔ پولیس حکام نے واضح کیا ہے کہ خلاف ورزی کرنے والوں کے خلاف قانون کے مطابق سخت کارروائی عمل میں لائی جائے گی۔ پولیس نے شہر بھر میں اسنیپ چیکنگ، گشت اور نگرانی کے عمل کو مزید مؤثر بنانے کی ہدایات جاری کی ہیں۔ امام بارگاہوں، مجالس اور جلوسوں کے راستوں کی پیشگی سوئپنگ کی جائے گی، جبکہ مشتبہ افراد اور گاڑیوں پر خصوصی نظر رکھی جائے گی۔ سیکیورٹی کے پیش نظر بعض حساس مقامات اور بلند عمارتوں پر ماہر نشانہ باز بھی تعینات کیے جائیں گے۔
یہ بھی پڑھیں : یرغمال پاکستانیوں کی جانب سے رہائی کیلئے وزیراعظم اور فیلڈ مارشل سے مداخلت کی اپیل کردی گئی
حکام کے مطابق جلوسوں کے راستوں پر غیر متعلقہ بھاری گاڑیوں، واٹر ٹینکرز اور ڈمپرز کے داخلے پر پابندی ہوگی، تاکہ کسی بھی ناخوشگوار واقعے سے بچا جا سکے۔ دوسری جانب کسی بھی ہنگامی صورتحال سے نمٹنے کیلئے بم ڈسپوزل اسکواڈ، کوئیک رسپانس فورس اور دیگر امدادی اداروں کو الرٹ رکھا گیا ہے۔ شہر کے مختلف اسپتالوں میں بھی خصوصی سیکیورٹی اور ایمرجنسی انتظامات مکمل کر لیے گئے ہیں۔ پولیس حکام کا کہنا ہے کہ محرم الحرام کے دوران فرقہ وارانہ ہم آہنگی اور مذہبی رواداری کے فروغ کیلئے امن کمیٹیوں کو فعال کر دیا گیا ہے، جبکہ علما کرام، ذاکرین اور منتظمین مجالس کے ساتھ مسلسل رابطے میں رہنے کی ہدایت دی گئی ہے تاکہ امن و امان کی فضاء برقرار رکھی جا سکے۔ حکام نے شہریوں سے اپیل کی ہے کہ وہ سیکیورٹی اداروں کے ساتھ تعاون کریں، کسی بھی مشتبہ سرگرمی کی فوری اطلاع متعلقہ اداروں کو دیں اور محرم الحرام کے دوران جاری کردہ ضابطہ اخلاق پر مکمل عملدرآمد یقینی بنائیں۔
The post محرم الحرام کے دوران کراچی میں سیکیورٹی کے غیر معمولی انتظامات، حساس مقامات پر کڑی نگرانی کا فیصلہ appeared first on شیعہ نیوز پاکستان.
